1-3 მაისს თბილისის 28-ე ჯაზ ფესტივალი გაიმართება. ღონისძიებებს კოტე მარჯანიშვილის სახელობის თეატრი უმასპინძლებს. წლევანდელი პროგრამა ტრადიციულად მსოფლიო დონის მუსიკოსებს აერთიანებს. ფესტივალი პირველ მაისს ამერიკელი საქსოფონისტისა და კომპოზიტორის, ლაკეშა ბენჯამინის კონცერტით გაიხსნება. მისი მუსიკა ჯაზის, ფანკისა და სოულის ელემენტებს აერთიანებს. 2 მაისს მსმენელის წინაშე გერმანელი მუსიკოსი თილ ბრონერი წარდგება. თბილისის 28-ე ჯაზ ფესტივალი 3 მაისს სტივ კოლმანისა და მისი ბენდის კონცერტით დასრულდება. მსოფლიოს ერთ-ერთი ყველაზე გავლენიანი ჯაზ საქსოფონისტის მუსიკა გამოირჩევა ფანკის, აფრიკული რიტმების, იმპროვიზაციის, ექსპერიმენტებისა და ინოვაციური მიდგომების სინთეზით.
თბილისის ჯაზ ფესტივალი სათავეს 1978 წლიდან იღებს და მას ორგანიზებას „ისთერნ ფრომოუშენი“ უწევს. წლების განმავლობაში ფესტივალმა არაერთ ლეგენდარულ მუსიკოსს უმასპინძლა, რის გამოც ის საქართველოში და მთლიანად რეგიონში ერთ-ერთ ყველაზე ავტორიტეტულ კულტურულ ღონისძიებად მიიჩნევა.
თბილისის ჯაზ ფესტივალი წელს პირველად გაიმართება კოტე მარჯანიშვილის თეატრში. 30 აპრილი ჯაზის საერთაშორისო დღეა, ამიტომ ფესტივალის პირველ მაისს გახსნას სიმბლური მნიშვნელობაც აქვს.
აღსანიშნავია, რომ „ისთერნ ფრომოუშენის“ სტრატეგიის მიხედვით, ჯაზ ფესტივალების სერიას მთელი წელი ეთმობა. როგორც ერთგული მსმენელისათვის უკვე ცნობილია, ფესტივალები ამ ეტაპზე ტარდება თბილისში, კახეთსა და ბათუმში, სხვადასხვა სეზონის შესაბამისად.
თბილისის ჯაზ ფესტივალის ბილეთების შესაძენად ეწვიეთ ბმულს.
