ერთ წელზე მეტი გავიდა მას შემდეგ, რაც მაიკლ ბოლტონმა გაამხილა, რომ ტვინის სიმსივნეს ებრძვის და ოპერაცია გაიკეთა. ამჯერად, ბოლტონი პირველად ღიად საუბრობს კიბოსთან ბრძოლის შესახებ.
People-ისთვის მიცემულ ინტერვიუში, რომელიც 30 აპრილს გავრცელდა და რომელშიც მისი ოჯახის წევრებიც მონაწილეობენ, 72 წლის მომღერალმა ახალ დეტალებზე, მათ შორის დიაგნოზის დასმის მომენტზე ისაუბრა. ბოლტონს 2023 წლის დეკემბერში გლიობლასტომა დაუდგინდა. როგორც სპეციალისტები განმარტავენ, ეს არის აგრესიული ტიპის სიმსივნე, რომელიც თავისა და ზურგის ტვინში სიმსივნური უჯრედების ზრდით იწყება და შეუძლია გაანადგუროს ჯანმრთელი ქსოვილი. დიაგნოზის დასმის შემდეგ ბოლტონს სასწრაფოდ ჩაუტარდა ოპერაცია. ეს ინფორმაცია მუსიკოსმა იანვარში გაასაჯაროვა, როცა გამოაცხადა, რომ დაგეგმილი კონცერტების გადადება უწევდა.
ბოლტონის ოპერაციისას ექიმებმა შეძლეს სიმსივნის სრულად მოცილება, ხოლო 2024 წლის იანვარში, ინფექციის მკურნალობის მიზნით, მან მეორედაც ჩაიტარა ტვინის ქირურგიული ჩარევა. მას შემდეგ, სხივურ და ქიმიოთერაპიასთან ერთად მკურნალობის ფონზე, აპრილის დასაწყისში ჩატარებულმა სკანირებამ აჩვენა, რომ ახალი სიმსივნური კერა არ წარმოქმნილა. თუმცა, როგორც ცნობილია, ბოლტონს ორ თვეში ერთხელ უწევს მაგნიტურ-რეზონანსული ტომოგრაფიის (MRI) ჩატარება, რადგან გლიობლასტომას რეციდივის მაღალი რისკი ახასიათებს.
„თხუთმეტი თვეა გასული ოპერაციიდან. იძულებული ვარ, საკუთარი ძალების სიღრმეში ჩავიხედო და ისეთი სიმტკიცე გამოვიჩინო, როგორზეც არასდროს მიფიქრია,” – განმარტავს ბოლტონი.
ჟურნალის ინფორმაციით, მკურნალობის პროცესმა გავლენა მოახდინა მის მეხსიერებაზე, მეტყველებასა და მოძრაობის უნარზე. ცხოვრების ამ გარდამტეხი გამოცდილების ფონზე ბოლტონი ამბობს, რომ მას მემკვიდრეობის მნიშვნელობა თავიდან აქვს გააზრებული. – თუ ადრე ამ ტერმინს მხოლოდ კარიერულ მიღწევებთან აკავშირებდა, ახლა მთავარი მისთვის ის არის, რას ტოვებს შვილებისა და შვილიშვილებისთვის.
„როგორ მივცე მათ რაღაც ისეთი, რაც ცხოვრების გზაზე გაჰყვებათ?“ – ამბობს ის People-თან საუბარში. „სიცოცხლის გაკვეთილები, სიყვარული, ნებისმიერი სახის თანადგომა – მინდა სწორი გზით მივაწოდო ეს ყველაფერი, რომ თავი უკეთ იგრძნონ. ეს არის სიკვდილის გააზრება. თითქოს უცბად ისმება კითხვა: ვიყენებ კი საუკეთესოდ ჩემს დროს? მინდა გავაგრძელო ბრძოლა. მგონია, რომ ჯერ კიდევ ბევრი რამ მაქვს გასაკეთებელი ამ ფრონტზე,“ – ამბობს ბოლტონი, რომელმაც უარი თქვა სამედიცინო პროგნოზის გაცნობაზე, რათა იმედი შეენარჩუნებინა. „სიმღერის სათაურიც მაქვს უკვე მოფიქრებული: Ain’t Going Down Without a Fight,”- ამბობს არტისტი.
ინტერვიუში მონაწილეობდნენ ბოლტონის ქალიშვილებიც, რომლებიც იხსენებენ, როგორ დაიწყო მამამ სიმღერა საავადმყოფოში, ოპერაციიდან რამდენიმე წუთში, როცა გონზე მოვიდა. ბოლტონმა და მისმა ოჯახმა, მათ შორის ექვსმა შვილიშვილმა ერთობლივად გადაიღეს ფოტო People-ის ნომრისათვის. ეს სურათი ბოლტონმა იმავე დღეს გამოაქვეყნა Instagram-ზე წარწერით: „იმედი მაქვს, რომ ამ გამოცდილების გაზიარება დაეხმარება სხვა ოჯახებს, რომლებიც მსგავსი გამოწვევების წინაშე დგანან და იქნებ შთაგონებაც კი გახდეს მათთვის, ვინც სირთულეებს ებრძვის.“
„ასევე მინდა გულით გადაგიხადოთ მადლობა ყველას იმ სიყვარულისთვის, მხარდაჭერისა და მოთმინებისთვის, რაც მთელი წლის განმავლობაში გამოიჩინეთ. თქვენ მე ძალა მომეცით და დღემდე იმავე ენერგიით მივიწევ წინ,” – მიმართა გულშემატკივრებს მაიკლ ბოლტონმა.
ეს ინტერვიუ პირველი შემთხვევაა, როცა ბოლტონი დეტალურად საუბრობს ჯანმრთელობის მდგომარეობაზე. მარტში მან მხოლოდ მოკლე პოსტი დაწერა Instagram-ზე: „გამოჯანმრთელების პროცესს გავდივარ და დღითი დღე უკეთ ვგრძნობ თავს.” ამავე პოსტში მუსიკოსმა აღნიშნა, რომ ამ პერიოდის განმავლობაში შვილებთან და შვილიშვილებთან ერთად ატარებდა დროს.
შემდეგ თვეში მან გამოაცხადა, რომ გადადებული კონცერტი ლონდონის O2 Arena-ზე 5 ივლისს გაიმართება. „მადლობა ჩემი გამოჯანმრთელების პერიოდში თქვენი უწყვეტი მხარდაჭერისთვის!” – დაწერა მან.
