29 აპრილს ბარბრა სტრეიზანდის ფანებს შესანიშნავი დილა გაუთენდათ – მომღერალი ახალ სტუდიურ ალბომს გამოსცემს. ჩანაწერი, სახელწოდებით The Secret of Life: Partners, Volume 2, 27 ივნისს გამოვა. ვარსკვლავებით დატვირთულ 10-სიმღერიან ალბომში შედის დუეტები ისეთ მუსიკოსებთან, როგორებიც არიან პოლ მაკარტნი, ბობ დილანი, მერაია კერი და არიანა გრანდე, ჯეიმს ტეილორი და სტინგი.
გამოსვლისთანავე ალბომი საუკეთესო ტრადიციული პოპ-ვოკალური ალბომის კატეგორიაში გრემის ნომინანტთა მოწინავე ხაზზე დადგება. გამარჯვების შემთხვევაში კი ეს სტრეიზანდის პირველი გრემი იქნება 39 წლის შემდეგ. ბოლო გრემი მომღერალმა 1987 წელს მიიღო ქალის საუკეთესო პოპ-ვოკალური შესრულებისთვის ალბომში The Broadway Album. მართალია, სტრეიზანდის მასშტაბის არტისტისთვის ეს ძალიან დიდი პაუზაა, თუმცა მომღერალს ამის შესახებ არასდროს დაუჩივლია.
იმდენი ხანია, რაც სტრეიზანდი გრემის მიღმაა, რომ მას არასდროს მოუგია საუკეთესო ტრადიციული პოპ-ვოკალური ალბომის ნომინაცია. აღნიშნული კატეგორია ცერემონიას 1991 წელს დაემატა. სტრეიზანდი მასზე 13-ჯერ იყო ნომინირებული, რაც მეორე ყველაზე მაღალი მაჩვენებელია 17-ჯერ ნომინირებული ტონი ბენეტის შემდეგ.
სტრეიზანდმა პირველი ორი გრემი 1964 წელს მოიგო, რაც ნიშნავს იმას, რომ თუ მომღერალი მომავალ წელს ჯილდოს დაიმსახურებს, ჯამში მას გრემის გამარჯვებების 62-წლიანი ისტორია ექნება, რაც ნებისმიერ კატეგორიაში გრემის ახალი რეკორდი იქნება. ამჟამად რეკორდი ტონი ბენეტს ეკუთვნის, რომლის გრემის გამარჯვებების ციკლი 59 წელს მოიცავს – 1963 წლიდან 2022 წლამდე, როცა მან ბოლოს სწორედ ტრადიციული პოპ-ვოკალური ალბომის კატეგორია მოიგო ლედი გაგასთან კოლაბორაციით Love for Sale.
თითქმის 40-წლიან პაუზამდე სტრეიზანდი გრემის ხშირი გამარჯვებული იყო. 1964 წელს, 22 წლის ასაკში, მან მოიგო წლის ალბომის კატეგორია სადებიუტო ჩანაწერით The Barbra Streisand Album და გახდა ამ კატეგორიის ყველაზე ახალგაზრდა გამარჯვებული. ეს სტატუსი მას 1996 წელს ალანის მორისეტმა ჩამოართვა, რომელმაც ეს ნომინაცია 21 წლის ასაკში მოიგო. ამჟამად კი რეკორდი ბილი აილიშს ეკუთვნის. მან წლის ალბომის ნომინაციაში 2020 წელს, 18 წლის ასაკში გაიმარჯვა ალბომით When We All Fall Asleep, Where Do We Go?
ჯამში სტრეიზანდი ექვსჯერაა ნომინირებული წლის ალბომის კატეგორიაში, რაც ასევე რეკორდი იყო ქალი არტისტისთვის გასულ წლამდე, როცა ტეილორ სვიფტმა მეშვიდე ნომინაცია მოიპოვა.
სტრეიზანდს მიყოლებით სამჯერ აქვს მოგებული გრემის ჯილდო ქალის საუკეთესო პოპ-ვოკალური შესრულებისთვის (1964-1966 წლებში), რითაც მან გაიმეორა ელა ფიცჯერალდის რეკორდული მაჩვენებელი (1959-1961). სხვა არც ერთ მუსიკოსს არ მოუგია აღნიშნული ნომინაცია (ან უბრალოდ საუკეთესო პოპ-სოლო შესრულების კატეგორია) მიყოლებით სამჯერ.
სხვა კომპოზიციებთან ერთად ახალ ალბომში შედის სიმღერა One Heart, One Voice – კოლაბორაცია მერაია კერისა და არიანა გრანდესთან, რომელიც აერთიანებს თავისი თაობის სამ უდიდეს მომღერალს: 83 წლის სტრეიზანდს, 56 წლის კერის და 31 წლის გრანდეს. ეს ერთგვარი გამოხმაურებაა 1963 წლის The Judy Garland Show-სი, როცა მაშინ 22 წლის სტრეიზანდმა 41 წლის ჯუდი გარლანდსა და 55 წლის ეთელ მერმანთან ერთად სიმღერა There’s No Business Like Show Business შეასრულა.
ახალი ალბომის გრემის პოტენციალი ჩანს მის გამხსნელ სიმღერაშიც – The First Time Ever I Saw Your Face. 1973 წელს რობერტა ფლეკის ორიგინალმა ვერსიამ გრემის წლის ჩანაწერის ნომინაციაში გაიმარჯვა. ხოლო თავად კომპოზიციამ, რომელიც 1957 წელს ევან მაკკოლმა დაწერა, წლის სიმღერის ჯილდო დაიმსახურა.
