Massive Attack მხარდაჭერას უცხადებს Kneecap-ს – ირლანდიურ ჰიპ-ჰოპ ტრიოს, რომელიც პროპალესტინური მესიჯების გავრცელების შემდეგ მასობრივი კრიტიკისა და ცენზურის ქვეშ მოექცა.
Massive Attack-მა ინსტაგრამზე განცხადება გაავრცელა, სადაც ბენდი იმ არაპროპორციულ გამოხმაურებას აკრიტიკებს, რაც Kneecap-მა პალესტინის მხარდამჭერი მესიჯების გავრცელების გამო მიიღო იმ ყურადღებასთან შედარებით, რასაც ღაზა მიმდინარე მოვლენების ფონზე იღებს.
„თუ დიდი პოლიტიკოსები ვერ პოულობენ ვერც დროსა და ვერც სიტყვებს, რომ დაგმონ, მაგალითად, 15 ჰუმანიტარული მოხალისის სიკვდილი ღაზაში; მოსახლეობის შიმშილობა, როგორც ომის წარმოების მეთოდი; ან იმავე ტერიტორიაზე ათასობით ბავშვის მკვლელობა იმ ქვეყნის მიერ, რომელიც ყველაზე დახვეწილ იარაღს ფლობს მთელ მსოფლიოში; რამდენად უნდა გაითვალისწინონ მუსიკალურმა ფესტივალებმა ასეთი ადამიანების მორალური რჩევა, თუ ვინ გამოიყვანონ სცენაზე?” – წერს Massive Attack.
„როგორც ბენდი, რომელიც 30 წელზე მეტია, რაც საჯაროდ და ხმამაღლა საუბრობს არალეგალურ ოკუპაციაზე, სეგრეგაციულ სისტემაზე და ათასობით პალესტინელის მკვლელობაზე, ჩვენ სრულად ვაცნობიერებთ ორივეს – მდაბიო პოლიტიკური დუმილის ადამიანურ ხარკს და ამავდროულად, დაჩაგრული ხალხის მიმართ საჯარო სოლიდარობის გამოთქმის კომერციულ შედეგებს.”
Kneecap-ის პოლიტიკური მესიჯები გლობალური მედიის მთავარ თემად იქცა Coachella-ზე მათი გამოსვლის შემდეგ, როცა სცენაზე მკაფიო ანტიისრაელური პოზიცია დააფიქსირეს, რომელიც, როგორც თავად ამტკიცებენ, ცენზურის ქვეშ მოექცა.
„ისრაელი გენოციდს სჩადის პალესტინელი ხალხის მიმართ,” – ეწერა სცენაზე აღმართულ პროექტორზე. „ამის ნებართვას კი აშშ-ის მთავრობა აძლევს, რომელიც აფინანსებს და იარაღით ამარაგებს ისრაელს, მიუხედავად საკუთარი დანაშაულებისა. თავისუფლება პალესტინას.”
Kneecap-ის განცხადებას მკვეთრად უარყოფითი შეფასებები მოჰყვა. შერონ ოზბორნი ითხოვდა, რომ ბენდის მომდევნო ჩრდილოამერიკული ტურნეს წინ მათი სამუშაო ვიზები გაეუქმებინათ. ტრიოსთან თანამშრომლობა შეწყვიტა მისმა აგენტმა Independent Artist Group-მაც.
ცოტა ხნის წინ Kneecap-მა ბოდიში მოიხადა გავრცელებული ვიდეომასალის გამო, სადაც ჯგუფის წევრები ბრიტანეთის პარლამენტის წევრების სიკვდილს ითხოვდნენ.
„სასაუბრო ენა, რა თქმა უნდა, მნიშვნელოვანია. ჯო კოქსისა და დევიდ ამესის საზარელი მკვლელობები ნიშნავს იმას, რომ არ არსებობს დაუდევრობისა და წინდაუხედაობის ადგილი,” – ამბობს Massive Attack.
„მაგრამ პოლიტიკოსებსა და მემარჯვენე ჟურნალისტებს, რომლებიც სტრატეგიულად თითხნიან ახალგაზრდა პანკბენდის სცენაზე ბუტბუტის მორალურ პასუხისმგებლობას მაშინ, როცა პარალელურ რეჟიმში აიგნორებენ რეალურ გენოციდს (მათ შორის უპრეცედენტო რაოდენობის ჟურნალისტების მკვლელობას), აქვთ რაიმე უფლება, ფესტივალებს პოლიტიკური ცენზურა აიძულონ?
აქ მთავარი ამბავი Kneecap არ არის. მთავარი ამბავი ღაზაა. გენოციდია მთავარი ამბავი. შემდეგ კი ბრიტანეთის მთავრობის სიჩუმე, თანხმობა და მხარდაჭერა კაცობრიობის წინაშე ჩადენილი დანაშაულების მიმართ – აი, ეს არის რეალური ამბავი. სოლიდარობა ყველა იმ არტისტს, ვისაც აქვს მორალური სიმამაცე, ისაუბროს ისრაელის ომის დანაშაულებზე და პალესტინელი ხალხის ჟლეტაზე.”
Massive Attack-ის შემდეგ Kneecap-ის მხარდამჭერი საჯარო განცხადება გააზიარა ლონდონში დაფუძნებულმა დამოუკიდებელმა ლეიბლმა Heavenly Recordings. განცხადებას სხვა მუსიკოსებთან ერთად ხელს Massive Attack-იც აწერს.
