კანიე უესტის ალბომის – Donda 2-ის სტრიმინგ სერვისებზე გამოჩენა შესაძლოა, ხანმოკლე აღმოჩნდეს. მას შემდეგ, რაც ამ დრომდე გამოუქვეყნებელი, 2022 წლის პროექტი სამშაბათს ღამით მოულოდნელად გამოჩნდა სტრიმინგ პლატფორმებზე, Ye (კანიე უესტი) ამტკიცებს, რომ ალბომზე მომუშავე პროდიუსერების მენეჯერები ფინანსურ ანაზღაურებას ითხოვენ და სამართლებრივი დავით იმუქრებიან.
„Free Maiden ცდილობს ნამუშევრებში, რომლებიც იმ ადამიანებთან ერთად გავაკეთე, ვისაც თავად ვასწავლე ბიტების კეთება, 3 მილიონი დოლარი გამომძალოს – ახლა კი აპირებს Donda 2 პლატფორმებიდან მოხსნას,“ – დაწერა Ye-მ სოციალურ ქსელ X-ში.
Free Maiden, როგორც ჩანს, იმ პროდიუსერების მენეჯერია, ვინც Donda 2-ზე იმუშავა. ამ პროდიუსერებს შორის არიან BoogzDaBeast და ბრაიან მილერი, რომლებსაც ეკუთვნით ალბომის ტრეკები: 530, Broken Road, City of Gods, Get Lost, We Did It Kid, Too Easy და First Time.
უესტის პოსტში, სავარაუდოდ, Free Maiden-ის ტექსტი იკითხება: „ჩვენ არ მიგვიცია თანხმობა ჩვენი ნამუშევრის გამოყენებაზე Donda 2-ისთვის და ნებისმიერი სხვა პროექტისთვის. Ye თითქმის 3 წელია, ფულს არ გვიხდის და მაინც აგრძელებს ჩვენი ნამუშევრის მოპარვას.“ Ye ასევე წერს: „ადვოკატები ერთ საათში აიღებენ ტრეკებს პლატფორმებიდან”.
ჯერ უცნობია, წაიშლება თუ არა ტრეკები სტრიმინგ პლატფორმებიდან. ამ ეტაპზე ალბომი კვლავ ხელმისაწვდომია YouTube Music-ზე, Spotify-სა და iTunes-ზე.
უესტმა ალბომი პირველად 2022 წლის თებერვალში მაიამის LoanDepot Park-ში გამართულ საღამოზე წარადგინა, თუმცა იმ დროისთვის ბევრი ტრეკი დაუსრულებელი იყო და სტრიმინგ პლატფორმებზე ამ დრომდე არ გამოჩენილა. Ye ცდილობდა, Donda 2 ექსკლუზიურად Stem Player-ის მეშვეობით გაეშვა.
18-ტრეკიანი ალბომის აღმასრულებელი პროდიუსერია Future, ხოლო მიწვეული არტისტების სიაში არიან ტრევის სკოტი, Playboi Carti, Migos, Baby Keem, Jack Harlow და სხვები.
Billboard კანიე უესტის და Spotify-ს წარმომადგენლებს დაუკავშირდა. როგორც გამოცემა იუწყება, კომენტარის მიღების შემდეგ ამ ამბავთან დაკავშირებულ სიახლეს გააშუქებს.
