5 მაისს Outkast-ის ლეგენდა ნიუ-იორკის მეტროპოლიტენის ხელოვნების მუზეუმში გამართულ Met Gala-ზე ზურგზე მოკიდებული პატარა ფორტეპიანოთი წარდგა. ამავე საღამოს არტისტმა ახალი ინსტრუმენტული ალბომი 7 Piano Sketches გამოუშვა. ალბომი ლეიბლ Epic Records-ის მეშვეობით მას შემდეგ გამოიცა, რაც მუსიკოსი თავისი განსხვავებული იმიჯით Met Gala-ს წითელ ხალიჩაზე წარდგა. ლუქი Burberry-ს, benji bixby-სა და სტილისტ Law Roach-ის თანამშრომლობით შეიქმნა.
Met Gala-ზე Andre 3000-ის იმიჯი მისი ახალი ალბომის ყდის დიზაინს იმეორებს. როგორც პრესრელიზშია აღნიშნული, თავდაპირველად პროექტის სახელწოდება „ისტორიაში საუკეთესო ცუდი რეპ ალბომი“ უნდა ყოფილიყო: „სასაცილოა, რადგან ეს ყველაზე ცუდი რეპ ალბომია. მას საერთოდ არ აქვს ლირიკა, მაგრამ ამავე დროს საუკეთესოა, რადგან ემოციურად ყველაზე თავისუფალი ვარ და პიროვნულადაც ასე კარგად არასდროს მიგრძნია თავი.” – ამბობს არტისტი.
Andre 3000-სთვის ალბომი 7 Piano Sketches მორიგ ინსტრუმენტულ პროექტს წარმოადგენს. ის მსმენელს 2023 წლის ალბომის, New Blue Sun-ის ერთგვარ გაგრძელებას სთავაზობს. ეს უკანასკნელი კი 2025 წლის გრემის დაჯილდოებაზე წლის ალბომთან ერთად დამატებით კიდევ ორ ნომინაციაზე იყო წარდგენილი.
ნოემბერში Andre 3000 Outkast-ის წევრ ბიგ ბოისთან ერთად როკ-ენ-როლის დიდების დარბაზში შევა.
მოუსმინეთ ახალ ალბომს და ნახეთ Andre 3000-ის ლუქი Met Gala-ზე.
