ცნობილი ქართველი კომპოზიტორისა და დირიჟორის ვახტანგ მაჭავარიანის გარდაცვალების შესახებ ინფორმაციას მისი შვილი სოციალურ ქსელში ავრცელებს:
“ღრმა სინანულით ვწერ, რომ წუხელ გარდაიცვალა მამაჩემი.” – წერს ალექსი მაჭავარიანი.
ვახტანგ მაჭავარიანმა მუსიკალური განათლება თბილისის სახელმწიფო კონსერვატორიაში მიიღო, შემდეგ კი სადირიჟორო ხელოვნების სრულყოფა მოსკოვში და ვენაში განაგრძო. კარიერის განმავლობაში თანამშრომლობდა მსოფლიოს წამყვან საოპერო და სიმფონიურ თეატრებთან.
ვახტანგ მაჭავარიანი მრავალი მნიშვნელოვანი მუსიკალური პროექტის ინიციატორი და ხელმძღვანელი იყო. 1990 წელს დააფუძნა საერთაშორისო საფესტივალო ორკესტრი, ხოლო 1996 წლიდან ევგენი მიქელაძის სახელობის საქართველოს სახელმწიფო სიმფონიური ორკესტრის მთავარი დირიჟორი გახდა. მისი ხელმძღვანელობით გაიმართა არაერთი ცნობილი პრემიერა, მათ შორის ჯუზეპე ვერდის ,,ფალსტაფი” და ვაგნერის ,,ტრისტანი და იზოლდა”.
ვახტანგ მაჭავარიანს ეკუთვნის მრავალი კომპოზიცია და სიმფონიური ნაწარმოები, რომელთა შორისაა სიმფონია №1 “სამყაროს ჰარმონია”, სიმფონიური პოემა “ნაცარქექია”, ოპერა რიჩარდ III. 2022 წელს თბილისში კიევის “კამერატას” 19-მა მუსიკოსმა ე. მიქელაძის სახელობის სახელმწიფო სიმფონიურ ორკესტრთან ერთად გამართა საქველმოქმედო კონცერტი, სადაც ვახტანგ მაჭავარიანმა სიმფონიური ნაწარმოები “მარიუპოლი” უკრაინაში განვითარებულ მოვლენებს მიუძღვნა.
2018 წლიდან ის იყო ფესტივალ „ღამის სერენადების“ მთავარი დირიჟორი. 2010 წლიდან თანამშრომლობდა თურქეთის სახელმწიფო სიმფონიურ ორკესტრთან.
გამოცემულია ვახტანგ მაჭავარიანის სადირიჟორო რეპერტუარის და მის მიერ შესრულებული საფორტეპიანო კომპოზიციების გრამფირფიტები და კომპაქტდისკები. ამასთან, ის იყო თბილისის ოპერისა და ბალეტის სახელმწიფო აკადემიური თეატრის მოწვეული დირიჟორი და პიანისტი.
