მომავალი 3D ანიმაციური ფილმი პოლ მაკარტნის 2005 წლის საბავშვო წიგნის, High in the Clouds-ის ეკრანიზაციაა. ფილმში მთავარი პერსონაჟების გახმოვანებაზე მუშაობენ სელინ დიონი, ჰიმეშ პატელი და ჰანა ვედინგჰემი.
გამოცემა Variety-ის ცნობით, ანიმაციას ასევე გაახმოვანებენ ისეთი ცნობილი სახეები, როგორებიც არიან: იდრის ელბა, ლიონელ რიჩი, რინგო სტარი, ჯიმი ფელონი, კლემანს პოესი, პომ კლემენტიეფი და ალენ შაბა.
ანიმაციურ ფილმს The Amazing Maurice-ის რეჟისორი ტობის გენკელი გადაიღებს, სცენარი კი ჯონ კროკერს (Paddington 2) ეკუთვნის. როგორც Variety წერს, ეს არის ამბავი, რომელიც „ოჯახის ძალაზე და მუსიკის მეშვეობით თავისუფლების გამოხატვის“ შესახებ მოგვითხრობს.
ანიმაციურ ფილმში პოლ მაკარტნის მიერ შექმნილი ორიგინალური სიმღერები ჟღერს. მუსიკის პროდიუსინგიც თავად მაკარტნის კომპანიას — MPL Communications-ს ეკუთვნის, ხოლო საუნდტრეკის ავტორი ოსკაროსანი კომპოზიტორი მაიკლ ჯაკინოა (Inside Out).
ანიმაციური ფილმის შესახებ ინფორმაცია მას შემდეგ გავრცელდა, რაც რეჟისორ სემ მენდესის გრანდიოზული პროექტის – The Beatles: A Four Film Cinematic Event-ის მთავარი როლის შემსრულებლების შესახებ გახდა ცნობილი. ოთხი დამოუკიდებელი ბიოგრაფიული ფილმი The Beatles-ის თითოეულ წევრს მიეძღვნება, კინოთეატრებში მისი გამოსვლა კი 2028 წლის აპრილში იგეგმება. მთავარ როლებს ასრულებენ: ჯონ ლენონი – ჰარის დიკინსონი, პოლ მაკარტნი – პოლ მესკალი, რინგო სტარი – ბარი კეოგანი და ჯორჯ ჰარისონი – ჯოზეფ ქუინი.
