როდესაც Met Gala-ს ხალიჩაზე LISA გამოჩნდა, მის ჩაცმულობასთან დაკავშირებით კითხვა გაჩნდა: „მართლა როზა პარკსია მის თეთრეულზე?“ – თუმცა დიზაინერების გუნდი, რომელთანაც ვარსკვლავმა ითანამშრომლა, ამ ეჭვებს უარყოფს.
ვარსკვლავის სამოსი არტისტ ჰენრი ტეილორისა და ფარელ უილიამსის კოლაბორაციით შეიქმნა. როგორც ჰენრი ტეილორის წარმომადგენელმა ჟურნალ Vulture-თან 5 მაისის ღონისძიების შემდეგ განმარტა, LISA-ს Louis Vuitton-ის კოსტიუმზე არ იყო გამოსახული არც როზა პარკსი და არც სამოქალაქო უფლებების დამცველი სხვა პერსონა. „გამოსახულება, რომელიც LISA-ს სამოსზეა, არ არის როზა პარკსი – ის ჰენრი ტეილორის მეზობელია,“ – ნათქვამია განცხადებაში.
„ამ სამოსზე დატანილი სახეები, Louis Vuitton-ის სხვა კოსტიუმების მსგავსად, სადაც ტეილორის ნამუშევრები იყო გამოყენებული, ყველა ჰენრის პირადი ცხოვრებიდანაა – არტისტის ოჯახის წევრები, მეგობრები და მეზობლები. ფიგურები აღებულია ჰენრის უკვე არსებული ნამუშევრებიდან, რომლებიც მან LVMH-ს 2023 წელს, ფარელის სადებიუტო კოლექციისთვის გადასცა,” – ნათქვამია არტისტის წარმომადგენლის განცხადებაში.
ეს განცხადება, ფაქტობრივად, პასუხობს იმ კრიტიკას, რაც LISA-მ ნიუ-იორკის მეტროპოლიტენის მუზეუმის ხალიჩაზე გამოჩენის შემდეგ მიიღო. ტაილანდელ ვარსკვლავს შავი, მბზინავი კოსტიუმი ეცვა Louis Vuitton-ის ლოგოთი, მაქმანზე კი სახეები იყო ამოქარგული. მომღერალი სოციალურ ქსელებში გააკრიტიკეს, რადგან ფიქრობდნენ, რომ ეს სახეები ისტორიულ სამოქალაქო აქტივისტებთან იყო კავშირში და ამის გათვალისწინებით, სამოსის დიზაინი უპატივცემულობასა და ემპათიის ნაკლებობას გამოხატავდა. კრიტიკა განსაკუთრებით იმ ფაქტორმა გაამძაფრა, რომ საღამოს თემა იყო Superfine: Tailoring Black Style, რაც სტილისა და მოდის საშუალებით შავკანიანი ხალხის იდენტობების წარმოჩენას გულისხმობდა. თუმცა, როგორც ტეილორის წარმომადგენელმა განმარტა: „LISA-ს სამოსზე გამოსახული არც ერთი სახე არ არის როზა პარკსი ან შავკანიანთა კულტურული ისტორიის სხვა ცნობილი ფიგურა.“
LISA ერთ-ერთი იყო BLACKPINK-ის იმ სამი წევრიდან, რომლებიც 2025 წლის Met Gala-ს დაესწრნენ. ხალიჩაზე ასევე გამოჩნდნენ ROSÉ და JENNIE. ღონისძიება იმ პერიოდს დაემთხვა, როცა ჯგუფის წევრები გაერთიანებისთვის ემზადებიან, მას შემდეგ, რაც 2023 წელს Born Pink World Tour დასრულდა. რაც შეეხება სოლო კარიერას, LISA სადებიუტო ალბომის, Alter Ego-ს გამოცემის შემდეგ კვლავაც აგრძელებს აქტიურ მუშაობას. 2 მაისს გამოვიდა მისი ახალი სინგლი Priceless, რომელიც Maroon 5-თან ერთად ჩაწერა.
რაც შეეხება Met Gala-ს, კოსტიუმირებული მიღების თანაორგანიზატორები წელს ფარელ უილიამსი, A$AP Rocky, კოლმან დომინგო და ლუის ჰამილტონი იყვნენ.
