ანიმაციური ფილმი Paw Patrol: The Dino Movie-ს შემოქმედებითი ჯგუფი ოფიციალურად ავრცელებს ინფორმაციას, რომ Snoop Dogg მსახიობთა გუნდს შეუერთდა.
ეს პოპულარული და ბავშვებისთვის საყვარელი ანიმაციის მესამე სრულმეტრაჟიანი ეპიზოდი იქნება, სადაც რეპერთან ერთად ისეთი ცნობილი სახეები მონაწილეობენ, როგორებიც არიან: EGOT ჯილდოს მფლობელი ჯენიფერ ჰადსონი, პერიზ ჰილტონი, ტერი კრიუსი, ჯამილა ჯამილი, ბილ ნაი, მერედით მაკნილი და რონ პარდო.
Paw Patrol: The Dino Movie-ს საიუბილეო პროექტია, რომელიც წინა ორი ანიმაციური ფილმის გაგრძელებაა. ფილმმა 350 მილიონ დოლარზე მეტი შემოსავალი მოიტანა. ახალი პროექტის წარმოებას კვლავ კალ ბრანკერი ხელმძღვანელობს, რომელმაც სცენარი ბობ ბარლენთან ერთად დაწერა.
,,PAW Patrol-ის საყვარელი გმირები ბრუნდებიან, მათ ახალ თავგადასავალს ნიჭიერი მსახიობები ახმოვანებენ. ამ შესანიშნავ გუნდს ახალი მსახიობები შეუერთდნენ და ფილმი ნამდვილ საოჯახო თავგადასავლად იქცევა. ჩვენი საყვარელი სამაშველო გუნდი უკვე 10 წლის არის და ის ბავშვებისა და დიდების გულს მთელს მსოფლიოში იპყრობს.” – განაცხადა Spin Master-ის გასართობი დეპარტამენტის პრეზიდენტმა ჯენიფერ დოჯმა.
აღსანიშნავია, რომ PAW Patrol ერთადერთი პროექტი არ არის, რითაც რეპერი ბოლო დროს დაკავებულია. Snoop Dogg-მა ახლახან NBCUniversal-თან მასშტაბური პარტნიორობის შესახებ გაავრცელა ინფორმაცია, რომლის ფარგლებშიც ის The Voice-ის მწვრთნელის როლში დაბრუნდება. ის ასევე ჩაერთვება სხვადასხვა სატელევიზიო, კინემატოგრაფიულ, სპორტულ და სტრიმინგ პროექტებში.
