ჯგუფმა Killages და სტეფანე მღებრიშვილმა ერთობლივი სიმღერა და მასზე გადაღებული მუსიკალური ვიდეო გამოაქვეყნეს. „გიჟივით გენდობი” – ასე ჰქვია ტრეკს, რომელიც ინტერნეტსივრცეში 12 მაისს გამოჩნდა.
ვიდეოში გამოყენებულია შემსრულებლების 3D-სკანირებული ვიზუალები, რომლებიც ვიდეოჩანაწერებიდან აღებული მოძრავი კადრების მეშვეობით გაცოცხლდა და შემდეგ AI-ის გამოყენებით დამუშავდა. კლიპის პროდიუსერი საბა შენგელიაა. ვიდეოზე სტუდია REFLECT-მა იმუშავა.
კლიპის შემქმნელების თქმით, საბოლოო შედეგი სრულად ციფრულია, თუმცა ადამიანურ ემოციასა და მუსიკის ენერგიას სინქრონში გადმოსცემს.
რაც შეეხება თავად სიმღერას, ეს Killages-ისა და სტეფანე მღებრიშვილის პირველი ერთობლივი ნამუშევარია. როგორც ჯგუფის წევრი გუგა მაჭარაშვილი Billboard Georgia-სთან საუბარში აღნიშნავს, იდეა დიდი ხნის განმავლობაში არსებობდა:
„ერთხელ სტეფანე მესტუმრა და თავისი იდეები გამიზიარა. სწორედ ამან მომცა შთაგონება და მეორე დღესვე გავუგზავნე ტრეკი. სიმღერის შინაარსი ისეთია, რომ ყველა მსმენელი თავისებურად აღიქვამს. ვიღაცისთვის ეს შეიძლება იყოს სიმღერა შეყვარებულზე, ვიღაცისთვის – მეგობარზე, საკუთარ თავზე, საყვარელ ფეხბურთის გუნდზე და ასე შემდეგ.”
