ტრამპის ადმინისტრაციამ შეერთებული შტატების საავტორო უფლებების ოფისის ხელმძღვანელი შირა პერლმატერი თანამდებობიდან გაათავისუფლა. ამ გადაწყვეტილებამდე რამდენიმე დღით ადრე თანამდებობა დაატოვებინეს კონგრესის ბიბლიოთეკის ხელმძღვანელსაც.
11 მაისს ტრამპის ადმინისტრაციამ განცხადება გაავრცელა, რომლის მიხედვითაც პერლმატერმა წინა დღეს თეთრი სახლიდან ელექტრონული ფოსტით მიიღო შეტყობინება, რომ მისი უფლებამოსილება დაუყოვნებლივ შეწყდა.
რამდენიმე დღით ადრე, 8 მაისს, დონალდ ტრამპმა თანამდებობიდან გაათავისუფლა კონგრესის ბიბლიოთეკის დირექტორი კარლა ჰეიდენი – პირველი ქალი და პირველი აფროამერიკელი, რომელიც ამ პოზიციას იკავებდა. ეს ნაბიჯი განიხილება, როგორც პრეზიდენტის ადმინისტრაციის მცდელობა, თანამდებობიდან გაათავისუფლოს ის პირები, რომლებიც, მათი შეფასებით, ეწინააღმდეგებიან პრეზიდენტის მიზნებსა და დღის წესრიგს.
პერლმატერი ამ პოზიციაზე 2020 წლიდან მუშაობდა. ცოტა ხნის წინ მისი ხელმძღვანელობით გამოქვეყნდა ანგარიში, რომელიც იკვლევდა, შეეძლოთ თუ არა ხელოვნური ინტელექტის სფეროში მომუშავე კომპანიებს საავტორო უფლებებით დაცული მასალების გამოყენება თავიანთი სისტემების „გადამზადებისთვის“. ეს იყო კვლევის მესამე ნაწილი, რომელიც 2023 წელს დაიწყო და ათასობით ადამიანის, მათ შორის AI დეველოპერების, მსახიობებისა და მომღერლების მოსაზრებებს მოიცავდა.
უფრო ადრე, იანვარში, ოფისმა განაცხადა, რომ საავტორო უფლებების დაცვის ნაწილში ეყრდნობოდა „ადამიანური კრეატიულობის გადამწყვეტ როლს“. აღნიშნული უწყება ყოველწლიურად დაახლოებით ნახევარ მილიონ საავტორო განაცხადს განიხილავს, რომლებიც მილიონობით ნამუშევარს მოიცავს. „თუ ეს კრეატიულობა AI სისტემების გამოყენებით გამოიხატება, ის კვლავაც დაცულია. მაგრამ იმ მასალისთვის, რომლის გამომსახველ ელემენტებს მანქანა განსაზღვრავს, საავტორო უფლებების გავრცელება კონსტიტუციურ მიზნებს დააზიანებს,“ – ნათქვამია განცხადებაში.
თეთრ სახლს პერლმატერის გათავისუფლების შესახებ კომენტარი არ გაუკეთებია. დემოკრატები ამ ფაქტს მალევე გამოეხმაურნენ.
„შირა პერლმატერის გათავისუფლების შესახებ დონალდ ტრამპის გადაწყვეტილება წარმოადგენს თვალსაჩინო და უპრეცედენტო ძალაუფლების მიტაცებას, რომელსაც არავითარი იურიდიული საფუძველი არ გააჩნია,“ – განაცხადა ნიუ-იორკის წარმომადგენელმა ჯო მორელემ, რომელიც წარმომადგენელთა პალატაში ადმინისტრაციულ საკითხთა კომიტეტის წევრია.
შირა პერლმატერს იურიდიული განათლება აქვს. საავტორო უფლებების ოფისის ხელმძღვანელად დანიშვნამდე, ის პატენტებისა და სავაჭრო ნიშნების დეპარტამენტში პოლიტიკის მიმართულების ხელმძღვანელად მუშაობდა, საავტორო უფლებების ოფისში კი 1990-იან წლებში დასაქმდა. პერლმატერს მედიასთან კომენტარი ჯერჯერობით არ გაუკეთებია.
