მადონას ფანები უკვე წლებია, პოპის დედოფალზე გადაღებულ ფილმს ელიან. ახალი ინფორმაციის თანახმად კი, საბოლოოდ ისინი მას იხილავენ.
გავრცელებული ცნობებით, მადონა Deadpool & Wolverine-ის პროდიუსერ შონ ლევისთან თანამშრომლობს საკუთარ ცხოვრებასა და კარიერაზე „ნეტფლიქსის” სატელევიზიო სერიალის გადასაღებად. ლევის კომპანია 21 Laps ამჟამად „ნეტფლიქსთან” ექსკლუზიურ შეთანხმებას ფლობს.
ახალი პროექტი, როგორც ჩანს, არ არის დაკავშირებული ბიოგრაფიულ ფილმთან, რომლის გადაღებასაც Universal Pictures გეგმავდა და რომელშიც პოპის დედოფალი ჯულია გარნერს უნდა განესახიერებინა. პროექტი 2023 წელს განუსაზღვრელი დროით შეჩერდა, როცა მადონა Celebration World Tour-ში გაემგზავრა.
თუმცა 2024 წელს მადონამ საფუძველი დაუდო ჭორებს, რომ შესაძლოა ფილმზე მუშაობა განახლებულიყო. მომღერალმა სოციალურ ქსელში ფოტოები ატვირთა, სადაც ის საბეჭდ მანქანასთან ზის და მუშაობს სცენარზე, სახელწოდებით Who’s That Girl.
საკუთარი ისტორიის სატელევიზიო სერიალად ქცევის იდეა კი მადონას გასული წლის ნოემბერში გაუჩნდა. როგორც მაშინ მომღერალი ამბობდა, პროდიუსერები და აგენტები არწმუნებდნენ, რომ ვერ შეძლებდა ისეთი ფილმის გადაღებას, როგორიც მას სურდა. „შეამცირე მასშტაბები – მეუბნებოდნენ ისინი. და მეც გავიაზრე, რომ ჩემს ცხოვრებაში ყველაფერი გამოწვევაა,” – დაწერა მომღერალმა პოსტში, სადაც ფანებს ეკითხებოდა, თუ რა ფორმით ერჩივნათ მისი ამბის ეკრანზე ხილვა – ფილმის თუ სერიალის სახით.
