აშერი კონცერტებზე ხშირად სთავაზობს მაყურებელს ალუბალს. ეს უკვე მისი სასცენო შოუების ნაწილად იქცა და ხშირად ვირუსულად ვრცელდება სოციალურ მედიაში. ლონდონში, გასულ კვირას გამართულ კონცერტზე, ეს ტრადიცია მოულოდნელად კომიკურ სიტუაციად იქცა. მომღერალმა სცადა, ალუბალი მიეწოდებინა მსმენელისთვის, რომელსაც, როგორც აღმოჩნდა, ამ ხილზე ალერგია ჰქონდა. მაყურებელმა თავაზიანად უარი თქვა აშერის შემოთავაზებულ ალუბალზე და აუხსნა, რომ მასზე ალერგია ჰქონდა.
სოციალურ ქსელებში გავრცელებულ ვიდეოში ჩანს, როგორ ცდილობს მომღერალი, გაერკვეს, მართლა აქვს თუ არა მსმენელს ალერგია. „ალუბალზე ალერგია გაქვს? ვინმეს ეპიპენი ხომ არ აქვს?“ – თქვა აშერმა სცენიდან და მსმენელს ჩაეხუტა.
„ლას ვეგასში სტაფილოთი დავიწყეთ,“ – იხსენებს მომღერალი The Jennifer Hudson Show-ში მონაწილეობის დროს. „მერე ვიფიქრე, მოდი, ყველა ხილი ვცადოთ და ვნახოთ, რომელი ჯობს. ალუბალი მომეწონა – სახალისო აღმოჩნდა.“
ლონდონის კონცერტამდე რამდენიმე დღით ადრე, აშერის ტრადიციამ კიდევ ერთხელ მიიქცია ყურადღება – 2025 წლის Met Gala-ზე გადაღებულ ფოტოში ჩანს, როგორ აწვდიდა ის ალუბალს საბრინა კარპენტერს. ამ მომენტს მოგვიანებით სოციალურ ქსელში კარპენტერის მამაც გამოეხმაურა.
