არტისტი LGP QUA 11 მაისს ფილადელფიაში მოკლეს. სამართალდამცველების თქმით, შემთხვევა წარუმატებელი ძარცვის მცდელობას უკავშირდება. ფილადელფიის პოლიციის დეპარტამენტმა ABC News-თან დაადასტურა, რომ 30 წლის მუსიკოსი რამდენიმე ჭრილობის შედეგად საავადმყოფოში გარდაიცვალა. პოლიცია ამ ეტაპზე სამ მამაკაცს ეძებს, რომლებიც შესაძლოა, კავშირში იყვნენ მომხდარ მკვლელობასთან. სამართალდამცავები აცხადებენ, რომ 20 000 დოლარს გადაუხდიან პირებს, ვისი დახმარებითაც შესაძლებელი გახდება დამნაშავეთა დაკავება და სასამართლო განაჩენის აღსრულება.
თავად რეპერი ღიად საუბრობდა შეიარაღებული ძალადობის წინააღმდეგ. „გულს მტკენს, რომ ხალხი QUA-ს მხოლოდ რეპერად იცნობდა, მაგრამ არ იცოდნენ, რომ ის ასევე აქტიური საზოგადოებრივი ლიდერი იყო. პირდაპირი მნიშვნელობით, ის იყო ახალგაზრდების ხმა,” — განუცხადა QUA-ს პრესმდივანმა, ნიკი ბაგბიმ ABC 6 Action News-ს.
ახალგაზრდა რეპერი სწორედ ამ გულწრფელი გზავნილების გამო მოიხსენიებოდა, როგორც “ახალგაზრდობის ხმა” — ის ქუჩის ცხოვრებაზე თავის სიმღერებში ღიად და პირდაპირ საუბრობდა. ციხეში გატარებული დროის შემდეგ, გადაწყვიტა პოზიტიური ცვლილებები დაესახა მიზნად და საკუთარი პიროვნება თავიდან ჩამოეყალიბებინა.
რეპერის მკვლელობას გამოეხმაურა წამყვანი მინა ლიონა, რომელმაც არაერთხელ ჩაწერა ინტერვიუ QUA-სთან. „ეს ამბავი გულს მტკენს, უბრალოდ სიტყვები არ ყოფნის,” — თქვა ლიონამ. მან ასევე ყურადღება გაამახვილა, თუ რამდენად ტრაგიკულია, რომ ასეთი პოზიტიური ადამიანიც კი შეიარაღებული ძალადობის მსხვერპლი გახდა. „ის შთააგონებდა სხვებს და მაინც, თვითონაც კი ვერ გაექცა იმ რეალობას, რომელსაც დღეს ჩვენი ახალგაზრდობა ებრძვის. ეს ძალიან სევდიანია.“
მუსიკალური ინდუსტრიიდან რეპერის მკვლელობას მიკ მილიც (Meek Mill) გამოეხმაურა.
LGP QUA-მ თავის ყოფილ სკოლას, Edward T. Steel Elementary-ს Puma-სთან ერთად 10 000 დოლარი შესწირა. ამისათვის მას სპეციალური ჯილდოც გადაეცა.
