პინკ ფლოიდის ლაივ ალბომი Pink Floyd at Pompeii: MCMLXXII ერთდროულად „ბილბორდის” რამდენიმე ჩარტის ტოპ ათეულშია. 2 მაისს გამოსულმა ჩანაწერმა ტოპ გაყიდვად ალბომებს შორის მესამე ადგილი დაიკავა, რაც ბოლო ათწლეულის განმავლობაში ბენდისთვის ერთი კვირის გაყიდვების ყველაზე მაღალი მაჩვენებელია.
ჩანაწერი ერთგვარი აუდიო კომპანიონია ამავე სახელწოდების საკონცერტო ფილმისა, რომელიც 1971 წელსაა გადაღებული. ფილმის თავდაპირველი ვერსია 1972 წელს გამოვიდა, თუმცა მისი აუდიო, როგორც დამოუკიდებელი პროექტი, აქამდე არასდროს გამოცემულა.
8 მაისით დათარიღებულ კვირაში აშშ-ში Pompeii-ს გაყიდვებმა 20 000 ეგზემპლარი შეადგინა. ჩანაწერი მოიცავს რვა გამოსვლას ფილმიდან და მისი შეძენა შესაძლებელია ორდისკიანი ან ორვინილიანი ნაკრებისა და ციფრული სახით. CD-ისა და ვინილის ვერსიებს ორი ბონუს ტრეკი მოჰყვება, ციფრულ ვერსიას კი – სამი. რაც შეეხება ფილმს, ალბომისგან დამოუკიდებლად გაიყიდა მისი განახლებული ვერსიაც როგორც ციფრულ, ასევე ფიზიკურ ფორმატში.
Pompeii-მ პირველი ადგილი დაიკავა დამოუკიდებელი ალბომების გაყიდვების ჩარტში, მეორე ადგილი ვინილალბომებში, ასევე მეორე ადგილი ტოპ როკალბომებში, მესამე ადგილი ტოპ როკ და ალტერნატიულ ალბომებში და 28-ე ადგილი Billboard 200-ში. Pompeii გახდა მეთხუთმეტე ალბომი, რომელიც Billboard 200-ის ტოპ 40-ში შევიდა და ჯამში 30-ე ალბომი, რომელიც აღნიშნულ ჩარტში მოხვდა.
ტოპ გაყიდული ალბომების ჩარტში მესამე ადგილითა და 20 000 გაყიდული ეგზემპლარით პინკ ფლოიდისთვის ეს ყველაზე წარმატებული გაყიდვების კვირაა ბოლო ათი წლის განმავლობაში. ამაზე მაღალი მაჩვენებელი ბენდს 2015 წლის 10 იანვრით დათარიღებულ ჩარტში ჰქონდა, როცა გამოშვებიდან მეშვიდე კვირას მათი ბოლო სტუდიური ალბომი The Endless River 29 000 ეგზემპლარად გაიყიდა.
„ბილბორდის” ტოპ გაყიდვადი ალბომების ჩარტი ყოველკვირეული რეიტინგია, რომელიც მხოლოდ ტრადიციულ გაყიდვებს ეფუძნება.
