15 მაისს მუსიკალურ პლატფორმებზე Tamada-ს და სტეფანე მღებრიშვილის კოლაბორაციული სიმღერა – For You I Would Be Enough გამოქვეყნდა, რომლის ვიდეოკადრებიც სტეფანეს გასული წლის სოლო კონცერტიდან არის აღებული.
სიმღერა Tamada-ს EP-ში, სახელწოდებით Shvebuleba-ში შევა. სამტრეკიანი EP-დან ორი სიმღერა უკვე გამოქვეყნდა, მესამე კომპოზიციის, Ar Tmob-ის გამოსვლა კი 23 მაისს იგეგმება.
„ორი წლის წინ, ბოლო ალბომზე მუშაობის პროცესში, სტეფანემ შემოიარა ლენო სტუდიაში. შემთხვევით, ამ სიმღერაზე ვმუშაობდი და ასე, ხუმრობა-ხუმრობით იმღერა მისამღერი. საშვილიშვილოდაც ასე დარჩა. ძალიან მიხარია სტეფანესთან კოლაბი და იმედია, თქვენც გაგახარებთ ეს ამბავი!”- წერს არტისტი სოციალურ ქსელში.
ახალ EP-ში Tamada-ს სამი ტრეკია გაერთიანებული (Davrchi Marto, For you i would be enough / feat. @stephanemgebrishvili და Ar Tmob), რომლებიც ეტაპობრივად, მაისის თვეში გამოიცემა.
EP – Shvebuleba-ს, ერთი შეხედვით, Tamada-ს ტრადიციული მუსიკალური ესთეტიკისგან განსხვავებული ჟღერადობა აქვს. აქ მუსიკას მელანქოლიური ტონი და ნოსტალგიური განწყობა გასდევს, რაც ბავშვობის დაკარგული ხმების ძიებაში და საკუთარი, ახალი მეს პოვნაში გეხმარება.
მოისმინეთ Tamada-ს და სტეფანე მღებრიშვილის კოლაბორაციული სიმღერა – For You I Would Be Enough:
