დონალდ ტრამპი ბრიუს სპრინგსტინზე გაბრაზებულია და მას „გადაჭარბებულად შეფასებულსა” და „ხისთავიანს” უწოდებს. პრეზიდენტმა სოციალურ ქსელში პოსტი მას შემდეგ გამოაქვეყნა, რაც მუსიკოსმა მანჩესტერის კონცერტის დროს ტრამპი გააკრიტიკა.
პარასკევ დილას, ორი დღის შემდეგ, რაც სპრინგსტინმა 2025 წლის ტურნეს პირველ კონცერტზე აშშ-ის მთავრობას „კორუფციული, არაკომპეტენტური და მოღალატეობრივი” უწოდა, ტრამპმა საპასუხოდ დაწერა: „ვხედავ, რომ გადაჭარბებულად შეფასებული ბრიუს სპრინგსტინი უცხო ქვეყანაში მიდის, რომ აშშ-ის პრეზიდენტზე ცუდად ილაპარაკოს.”
„არასდროს მომწონდა ის და მისი მუსიკა, ან მისი რადიკალური მემარცხენე პოლიტიკა და რაც ყველაზე მნიშვნელოვანია, ის არ არის ნიჭიერი ადამიანი, არამედ უბრალოდ ამბიციური, უსიამოვნო სულელი, რომელიც მხურვალედ უჭერდა მხარს ჯო ბაიდენს, მენტალურად გაუწონასწორებელ და ჩვენს ყველაზე ცუდ პრეზიდენტს, რომელმაც ქვეყანა ლამის განადგურებამდე მიიყვანა. მძინარე ჯომ თავად არ იცოდა, რას აკეთებდა, მაგრამ სპრინგსტინი ხისთავიანია და ვერ ხედავდა, რა ხდებოდა, ან იქნებ ხედავდა კიდეც (რაც კიდევ უფრო უარესია)?!
ამ გამომშრალმა როკერის ჩირმა (მისი კანი სრულად ატროფირებულია!) უნდა დახუროს პირი, სანამ ქვეყანაში დაბრუნდება, თორემ ვნახავთ, როგორ გაგრძელდება ეს ამბავი მისთვის!”
ორი იმპიჩმენტის მქონე პრეზიდენტის კომენტარი სპრინგსტინის მანჩესტერის კონცერტს მოჰყვა, სადაც მუსიკოსმა თქვა:
„ჩემი სახლი, ამერიკა, რომელიც მიყვარს, ამერიკა, რომელზეც სიმღერებს ვწერ და რომელიც 250 წლის განმავლობაში იმედისა და თავისუფლების შუქურაა, ახლა კორუმპირებული, არაკომპეტენტური და მოღალატე ადმინისტრაციის ხელშია. ამ საღამოს ჩვენ ვთხოვთ ყველას, ვისაც სჯერა დემოკრატიისა და ჩვენი საუკეთესო ამერიკული გამოცდილების, აიმაღლეთ ხმა ავტორიტარიზმის წინააღმდეგ. დაე, დარეკოს თავისუფლების ზარმა.”
სპრინგსტინი, რომელმაც აღნიშნული სიტყვა ინსტაგრამზეც დაპოსტა, დიდი ხანია, აქტიურადაა ჩართული ამერიკის პოლიტიკაში. ის მხარს უჭერდა ტრამპის ოპონენტ კამალა ჰარისს 2024 წლის საპრეზიდენტო არჩევნებში. ოთხი წლით ადრე კი მან ტრამპს „დემოკრატიის საფრთხე” უწოდა.
სპრინგსტინი ერთ-ერთია იმ მრავალ მუსიკოსთაგან, რომლებიც აშშ-ის პრეზიდენტს ღიად უპირისპირდებიან. ამასთან, ის არ არის ერთადერთი, ვინც ბოლო დროს ტრამპმა საჯაროდ გააკრიტიკა. პარასკევს ტრამპმა სოციალურ ქსელში პოსტი ტეილორ სვიფტზეც დაწერა.
