ფრანგი რეპერი Werenoi, რომლის ნამდვილი სახელია ჯერემი ბანა ოუონა, გარდაიცვალა. ინფორმაციას მისი მუსიკალური ლეიბლი და პროდიუსერი ავრცელებენ. 2023 და 2024 წლებში არტისტი საფრანგეთში ალბომების გაყიდვების ლიდერი იყო, რაც საერთაშორისო ფონოგრაფიული ინდუსტრიის ფედერაციის (IFPI) მონაცემებით დასტურდება. რეიტინგი აერთიანებს როგორც ფიზიკურ და ელექტრონულ გაყიდვებს, ისე სტრიმინგ პლატფორმების მაჩვენებელს.
„უსაზღვრო მწუხარებით ვიუწყებით Werenoi-ს გარდაცვალებას,“ – წერია მისი ლეიბლის, Believe-ის განცხადებაში, რომელიც Instagram-ზე გამოქვეყნდა: „ჩვენი ფიქრები მის ოჯახთანაა, ახლობლებთან, გუნდთან და ყველა იმ ადამიანთან, ვისაც ის უყვარდა.“
Werenoi-ს გარდაცვალებას ასევე გამოეხმაურა რეპერის პროდიუსერი Babs. „ მშვიდად განისვენე, მეგობარო. მიყვარხარ,” – დაწერა მან სოციალურ ქსელ X-ზე.
ფრანგული მედიის ინფორმაციით, მუსიკოსი პარიზის საავადმყოფოში 17 მაისს, შაბათს, გამთენიისას გარდაიცვალა. სიკვდილის ოფიციალური მიზეზი ამ დრომდე არ გასაჯაროებულა.
Werenoi დიდი აუდიტორიის წინაშე პირველად 2021 წელს გამოჩნდა, როდესაც YouTube-ზე ატვირთა სიმღერა Guadalajara, რომელმაც ასიათასობით ნახვა დააგროვა და მას დიდი სცენისაკენ მიმავალი გზა გაუხსნა. რეპერმა სამი ალბომი გამოუშვა: Carré (2023), Pyramide (2024) და Diamant Noir (2025). ამ ნამუშევრებით ის თანამედროვე ფრანგულ რეპში ერთ-ერთ ყველაზე გავლენიან არტისტად იქცა.
Werenoi-ს გარდაცვალებას სოციალური ქსელებით გამოეხმაურნენ კოლეგებიც.
