დონალდ ტრამპი ბიონსეს, ბრიუს სპრინგსტინსა და სხვა ვარსკვლავებს კამალა ჰარისის 2024 წლის საარჩევნო კამპანიის თაღლითურ სქემაში მონაწილეობაში ადანაშაულებს. აშშ-ის პრეზიდენტი საქმეზე გამოძიების დაწყებას ითხოვს.
19 მაისს სოციალური ქსელით გავრცელებულ პოსტებში ტრამპი ჯერ ბრიუს სპრინგსტინს ადანაშაულებს ჰარისის კამპანიაში მონაწილეობის სანაცვლოდ გასაიდუმლოებული თანხის აღებაში, შემდეგ კი ბიონსეს, ოპრა უინფრისა და ბონოს.
„რამდენი გადაუხადა კამალა ჰარისმა ბრიუს სპრინგსტინს უნიჭო გამოსვლაში საპრეზიდენტო კამპანიის დროს? და რატომ აიღო მან ეს თანხა, თუ ჰარისის ასეთი ფანია?
ეს არ არის არალეგალური კონტრიბუცია? და ბიონსეს შემთხვევაში? ან ოპრასთან და ბონოსთან რა თანხა წავიდა? ვაპირებ, რომ საქმეზე გამოძიება მოვითხოვო. კანდიდატებს არ აქვთ უფლება, მხარდაჭერისთვის თანხა გადაიხადონ, რაც კამალამ გააკეთა და შემდეგ „გართობისთვის” გადახდით შენიღბა. გარდა ამისა, ეს იყო ძალიან ძვირადღირებული და სასოწარკვეთილი მცდელობა, ხელოვნურად გაეზარდა მისი მეჩხერი აუდიტორია.”
„ეს არ არის ლეგალური,” – დაამატა ტრამპმა. „ამ არაპატრიოტი „გამრთობებისთვის” კი ეს უბრალოდ კორუფციული და უკანონო გზა იყო, სარგებელი მიეღოთ გაფუჭებული სისტემისგან.”
მომდევნო პოსტში ტრამპი უფრო დაკონკრეტდა: „ბიონსეს 11 000 000 დოლარი გადაუხადეს, რომ უბრალოდ სცენაზე გამოსულიყო და კამალასთვის ნაჩქარევად დაეჭირა მხარი. სცენიდან კი უკმაყოფილო ხალხის შეძახილებით გავიდა, რადგან ერთი სიმღერაც კი არ შეასრულა. არ დაგავიწყდეთ, რომ დემოკრატებმა და კამალამ მას არალეგალურად მილიონობით დოლარი გადაუხადეს მხოლოდ იმისთვის, რომ კამალას მხარდამჭერი სიტყვა ეთქვა. ეს არის უმაღლესი დონის საარჩევნო თაღლითობა. ეს არის არალეგალური კონტრიბუცია კამპანიაში! ბრიუს სპრინგსტინს, ოპრას, ბონოსა და შესაძლოა ბევრ სხვასაც ასახსნელი აქვთ რაღაცები!!!”
11 მილიონი დოლარის ოდენობის თანხის ბიონსესთვის გადარიცხვის დაუდასტურებელი ინფორმაცია სოციალურ მედიაში შარშან ამოტივტივდა. იმ დროს ფაქტის გადამმოწმებელმა ორგანიზაციებმა აღნიშნული ქმედების დამადასტურებელი მტკიცებულებები ვერ იპოვეს.
ბიონსე აქტიურად იყო ჩართული 2024 წლის საპრეზიდენტო კამპანიაში. მომღერალი სიტყვით გამოვიდა ჰიუსტონის შეკრებაზეც, სადაც მოსახლეობას ჰარისის მხარდაჭერისკენ მოუწოდა.
როგორც ირლანდიის მოქალაქე, ბონო 2024 წლის საარჩევნო კამპანიაში არ ჩაბმულა და არც კამპანიის ფარგლებში გამართულ რომელიმე ღონისძიებაში მიუღია მონაწილეობა.
რაც შეეხება ბრიუს სპრინგსტინს, ტრამპმა პირველად მიზანში სწორედ ის ამოიღო მას შემდეგ, რაც მუსიკოსმა მანჩესტერში გამართული კონცერტის დროს აშშ-ის პრეზიდენტის ადმინისტრაცია კორუფციულ, არაკომპეტენტურ და მოღალატეობრივ მთავრობად მოიხსენია. ტრამპმა კი საპასუხოდ მას ამბიციური, უსიამოვნო სულელი უწოდა.
2024 წლის საპრეზიდენტო კამპანიაში კამალა ჰარისს მხარს კიდევ არაერთი ვარსკვლავი უჭერდა, მათ შორის ბილი აილიში, ქარდი ბი, ემინემი და სხვები. ფინანსური დოკუმენტებით არ მტკიცდება, რომ აღნიშნული აქტივობების სანაცვლოდ მათ რაიმე თანხა აქვთ მიღებული, რასაც ჰარისის კამპანიის წარმომადგენელიც უარყოფს: „ჩვენ არასდროს არც ერთი არტისტისთვის და გამომსვლელისთვის ფული არ გადაგვიხდია.”
ჰარისის მხარდაჭერისთვის თანხის მიღება უარყო ბიონსეს მხარემაც. მუსიკოსის დედამ ტინა ნოულზმა ნოემბერში სოციალურ ქსელში დაწერა: „ტყუილია, თითქოს ბიონსეს 10 მილიონი გადაუხადეს, რათა ჰიუსტონის შეკრებაზე სიტყვით გამოსულიყო. რეალურად მას ერთი ცენტიც არ მიუღია, პირიქით, საკუთარი და გუნდის ფრენის ხარჯებიც თავად დაფარა. ისინი არა მხოლოდ იტყუებიან და უპატივცემულოდ ეპყრობიან ბიონსეს სახელს, არამედ ჩვენი ვიცე-პრეზიდენტის დისკრედიტაციასაც ეწევიან. როდის უნდა შეჩერდეს ეს ტყუილები და ჭორები?”
არსებობს დოკუმენტი, რომლის მიხედვითაც ჰარისი ბიონსეს კომპანიას ტეხასის ღონისძიების შემდეგ 165 000 დოლარს ურიცხავს. აღნიშნული ტრანზაქცია ფედერალურ კანონთან შესაბამისობაშია.
