ქეთათო ნერგაძემ ახალი ვიდეო წარადგინა. ეს არის სიმღერების Ordinary Words და More Than Forever-ის ლაივ სესია, რომელიც Leno Records-ის სივრცეში, 5 იანვარს გამართულ სოლო კონცერტზე ჩაიწერა. ბოლო თვეების განმავლობაში არტისტმა აღნიშნული კონცერტიდან კიდევ ორი ლაივ სესია გამოაქვეყნა.
ქეთათო ნერგაძე Leno Records-ში გამართულ კამერულ სოლო კონცერტზე მსმენელის წინაშე ბენდთან და კამერულ ორკესტრთან ერთად წარდგა. საღამოზე მან როგორც უკვე გამოქვეყნებული, ასევე სრულიად ახალი, მსმენელისათვის აქამდე უცნობი კომპოზიციები შეასრულა.
„ეს კონცერტი საქველმოქმედო მიზანს ემსახურებოდა — შემოსული თანხით რეპრესიების პერიოდში სამსახურიდან გათავისუფლებულ მეშახტეებს დავეხმარეთ. მალე იგეგმება ამ საღამოს სრული ვიდეოჩანაწერისა და აუდიო ალბომის გამოშვებაც. რაც შეეხება ამ ვიდეოს, Ordinary Words და More Than Forever ჩემთვის ძალიან მნიშვნელოვანი სიმღერებია, რომლებიც კონცერტზე ერთ ნომერში გავაერთიანე. ვფიქრობ, ორივე ნაწარმოები თანამედროვე სამყაროში არსებულ გამოწვევებს ეხება და საბოლოოდ ერთ საკითხამდე მივდივართ — ადამიანის ეგომდე. სწორედ ამ საერთო თემატიკის გამო გადავწყვიტე მათი ამ ფორმით, ერთად შესრულება,” — ამბობს მუსიკოსი.
როგორც არტისტი Billboard Georgia-სთან საუბრისას აღნიშნავს, უახლოეს მომავალში აპირებს, პირველ სრულ ალბომზე დაიწყოს მუშაობა. არტისტი სამომავლოდ ბენდთან ერთად კონცერტების გამართვასაც გეგმავს.
