23 მაისს ქართველმა არტისტმა მურმან წულაძემ სადებიუტო ალბომი, სახელწოდებით $haba$h გამოაქვეყნა. ალბომი 9 სიმღერას და ბონუს კომპოზიციას აერთიანებს და როგორც თავად არტისტი ამბობს, ის ერთგვარად მისი მუსიკალური ავტობიოგრაფიაა.
ალბომი იწყება კომპოზიციით “გურია”, რაც მუსიკოსისთვის სიმბოლურად სახლის განცდას ატარებს. მუსიკალური მოგზაურობა ბელგიაში გრძელდება – ქვეყანაში, სადაც პროექტი „მურმან წულაძე“ დაიბადა და განვითარდა.
„ეს ალბომი რაღაცნაირად ჩემი ცხოვრებაა, რომელიც ძალიან პირადულია. რადგან პირველი ალბომია, მინდოდა იმის მოყოლა, თუ ვინ ვარ და რას წარმოვადგენ. $haba$h – თითქოს ჩემი თავის პრეზენტაციაა. ალბომი გურიაზე დაწერილი კომპოზიციით იწყება, იმიტომ რომ იქ თავს მართლა სახლში ვგრძნობ. მერე მოსდევს ბელგია – პროექტი „მურმან წულაძე“ ბრიუსელში დაიბადა. სიმღერაში – ARA ფრანგულად ვამბობ:
“იმედია, იქ კიდევ დავბრუნდები,
რომ ჩემი ღვინო დავლიო.
იმედია იქ დავბრუნდები, სანამ ყველაფერი დაიწვება.”
როგორც არტისტი განმარტავს, ტექსტში გამოყენებული ფრაზები მეტაფორულია და ალბომის ერთ-ერთი ძირითადი თემაც სწორედ წარსულსა და მომავალს შორის ბალანსის ძიებაა.
მუსიკოსის ინსპირაციები მრავალფეროვანია: ბავშვობისდროინდელი პიანინო, კასეტებზე ჩაწერილი ძველი მელოდიები და ხეტიალი ევროპაში. ალბომის დემო ვერსიები სხვადასხვა ადგილას შეიქმნა: კომპოზიციები Money და Sans dormir საფრანგეთის სამხრეთში, ბიარიცში ჩაიწერა, სადაც მურმან წულაძე ფრანგულ ჯგუფ La Femme-ის გიტარისტთან, საშასთან თანამშრომლობდა. ალბომის ბოლო ტრეკი – shape by society არტისტის ანტი-კონფორმისტულ პოზიციას გამოხატავს, რომელიც სისტემასთან მიმართებაში წინააღმდეგობრივ დამოკიდებულებას უსვამს ხაზს.
„ბავშვობაში შემაყვარეს სუფრასთან პიანინოზე დაკვრა, კასეტის ჩანაწერები (Gelodi)… ამასობაში აქეთ-იქით ვბოდიალობდი და ვხვდებოდი საინტერესო ხალხს… თან ერთ რამეს ვერ გაექცევი – ფულზე ფიქრს. ალბომს სიმღერა shape by society-ით ვამთავრებ, არ მიყვარს როცა მაფორმატებენ… და მიყვარს ისეთი ხალხი, ვისაც სისტემაში არ სვამენ.
ამ ალბომის დემო ვერსიები ბევრ განსხვავებულ ადგილას დავწერე. მაგალითად: სიმღერები Money და Sans dormir ბიარიცში, სამხრეთ საფრანგეთში, საშასთან, la femme-ის გიტარისტთან ჩაიწერა. „ჩაკეტეს გზების“ წერაც იქ დავიწყე, Ruisbroek c’est LA რა თქმა უნდა, რუისბრუქში. ალბომში არის რამდენიმე კოლაბორაცია, რომლებისთვისაც აქეთ-იქით ვირბინე. რუსთავშიც კი ჩავწერე რაღაცები. თანდათან ვმიქსავდით და არანჟირებას ვუკეთებდით მე და ჩემი ხმის ინჟინერი Kevin heuze. სამუშაო პროცესი პარიზში დაახლოებით ერთი წლის განმავლობაში მიმდინარეობდა.“ – ამბობს არტისტი „ბილბორდ საქართველოსთან“ საუბრისას.
მოისმინეთ მურმან წულაძის ავტობიოგრაფიული სადებიუტო ალბომი – $haba$h:
