2025 წლის ევროვიზიის გამარჯვებული ღაზაში მიმდინარე ომის წინააღმდეგია და კონკურსში ისრაელის მონაწილეობის საკითხზე საუბრობს. JJ-ის თქმით, მას სურს, რომ მომდევნო წელს ისრაელი ევროვიზიაზე აღარ დაუშვან.
„სამწუხაროა,რომ ისრაელი მაინც მონაწილეობს კონკურსში. ვისურვებდი, რომ შემდეგი ევროვიზია ვენაში ისრაელის გარეშე გაიმართოს.”
ევროვიზიის დირექტორმა მარტინ გრინმა „ბილბორდთან” საუბარში აღნიშნა: „სრულიად პატივს ვცემთ JJ-ის პირადი აზრის გამოხატვის თავისუფლებას და გვესმის წუხილი, რომელიც ახლო აღმოსავლეთში ამჟამინდელ კონფლიქტს ეხება.”
ევროვიზიის სიმღერის კონკურსი საკუთარ თავს არაპოლიტიკურ ღონისძიებას უწოდებს. მის წესებში აღნიშნულია, რომ მონაწილე მაუწყებლებმა ყველა საჭირო ნაბიჯი უნდა გადადგან იმითვის, რომ მათმა დელეგაციებმა და გუნდებმა დაიცვან ევროვიზიის ინტერესები და კონკურსი არც ერთ შემთხვევაში არ გახდეს პოლიტიზებული, არ იქნას გამოყენებული ინსტრუმენტად ან არ მოხდეს მისი დისკრედიტაცია ნებისმიერი გზით.
ავსტრიის წარმომადგენელი JJ წლევანდელი ევროვიზიის გამარჯვებული გახდა სიმღერით Wasted Love, რომელიც ოპერასა და ელექტრონულ მუსიკას აერთიანებს. JJ ავსტრიიდან კონკურსის პირველი გამარჯვებულია კონჩიტა ვურსტის შემდეგ.
მეორე ადგილი კი სწორედ ისრაელის მონაწილე იუვალ რაფაელმა დაიკავა, რომელმაც მაყურებლისგან ყველაზე მეტი ხმა მიიღო.
ინტერვიუში JJ-მ ასევე აღნიშნა, რომ ევროვიზიის ხმის დათვლის სისტემა უნდა შეიცვალოს და უფრო გამჭვირვალე გახდეს.
„მნიშვნელოვანია, აღვნიშნოთ, რომ ევროვიზიის კონკურსის ხმის მიცემის სისტემა მსოფლიოში ყველაზე განვითარებულია. თითოეული ქვეყნის შედეგი უზარმაზარი გუნდის მიერ მოწმდება, რათა გამოირიცხოს ნებისმიერ საეჭვო ან არაკანონიერი მეთოდის გამოყენება,” – ამბობს მარტინ გრინი ხმების დათვლის გარშემო არსებული ეჭვების პასუხად.
ევროვიზიის სიმღერის მომდევნო კონკურსი 2026 წელს ვენაში გაიმართება.
