Aine Merme-ს (ნატუკა ნაცვლიშვილის) ახალი სინგლი Writing a Love Song is Brave არტისტის პირველი სიმღერაა სიყვარულის შესახებ, რომელიც განშორების შემდგომი ემოციური ფაზების მონაცვლეობას იკვლევს. სტრუქტურითა და შინაარსით კომპოზიცია აღწერს მდგომარეობებს, რომლებიც ყველასთვის საერთოა. ეს არის გლოვის, ბრაზის და მიღების ქაოსური თანმიმდევრობა, რასაც საბოლოოდ ზრდამდე მივყავართ.
ავტორის თქმით, ზემოთ ჩამოთვლილი მდგომარეობისთვის მუსიკალური ფორმის მიცემა განსაკუთრებით რთული აღმოჩნდა, რადგან ეს პროცესი უკიდურეს სიშიშვლესა და გულწრფელობას საჭიროებს. სწორედ ამ ფაქტს ეხმიანება კომპოზიციის სათაურიც.
Aine Merme არასოდეს ერიდებოდა ინდივიდუალური თუ შედარებით ზოგადი საკითხების მუსიკაში თარგმნას, თუმცა ამბობს, რომ ამჯერად მისი გზავნილი ერთმნიშვნელოვანია და გულისხმობს სუბლიმაციას – სხვადასხვა რანგის ემოციური შინაარსების შემოქმედებით დამუშავებასა და გამოთავისუფლებას, რასაც უთუოდ სულიერ სიმშვიდემდე მივყავართ.
Aine Merme-ს ახალი სიმღერის პრეზენტაცია და live საღამო 7 ივნისს „ეარში“ გაიმართება.
