სელენა გომესი დიდი ხნის მეგობარ ტეილორ სვიფტს ბოლო მიღწევას ულოცავს. 30 მაისს გომესმა სვიფტს მხარდაჭერა გამოუცხადა მას შემდეგ, რაც სუპერვარსკვლავმა გაამხილა, რომ მან ოფიციალურად შეისყიდა და დაიბრუნა საავტორო უფლებები თავის პირველ ექვს ალბომზე.
„შენ ეს შეძელი, ტეი!!!” – დაწერა გომესმა ინსტაგრამზე. „ძალიან ვამაყობ!”
საავტორო უფლებების დაბრუნების შესახებ სვიფტმა განცხადება იმავე დღის დასაწყისში გააკეთა. მომღერალმა სოციალურ ქსელში თავის პირველ ექვს ალბომთან ერთად გადაღებული ფოტოები გამოაქვეყნა და ფანებს ემოციური წერილით მიმართა:
„ჩემი ყველაზე დიდი ოცნება ახდა. ჩემმა ფანებმა იციან, რამდენად მნიშვნელოვანი იყო ეს ჩემთვის – იმდენად, რომ ოთხი მათგანი საგულდაგულოდ ხელახლა ჩავწერე, ტეილორის ვერსია დავარქვი და გამოვეცი.
ის მხარდაჭერა, რაც თქვენ ამ ალბომების მიმართ გამოიჩინეთ და ის წარმატება, რაც „ერას ტურს” მოუტანეთ, მიზეზია, რის გამოც მე ჩემი მუსიკის დაბრუნება შევძელი. საკმარისად ვერ გადაგიხდით მადლობას იმისთვის, რომ სწორედ თქვენი დახმარებით შევძელი ჩემი შემოქმედების დაბრუნება, რომელსაც მთელი ცხოვრება მივუძღვენი, მაგრამ მე არ მეკუთვნოდა.”
როგორც წყარო „ბილბორდთან” საუბარში აღნიშნავს, სვიფტმა საკუთარ ალბომებზე საავტორო უფლება კერძო კომპანია Shamrock Capital-ისგან 360 მილიონ დოლარად გამოისყიდა.
გომესისა და სვიფტის მეგობრობა ორ დეკადას ითვლის. მომღერლები პირველად ერთმანეთს 2008 წელს Jonas Brothers-ის მეშვეობით შეხვდნენ. სვიფტი მაშინ ჯოს ხვდებოდა, გომესი კი – ნიკს. მას შემდეგ პოპვარსკვლავებს ახლო მეგობრობა აკავშირებთ და მუდმივად მხარს უჭერენ ერთმანეთს პირადი ცხოვრებისა თუ კარიერის წარმატებულ და რთულ მომენტებში.
