Duran Duran ხმისჩამწერ სტუდიაში ოფიციალურად დაბრუნდა, ამჯერად ერთ-ერთ ყველაზე ლეგენდარულ კოლაბორატორთან ერთად. 1-ელ ივნისს ბრიტანულმა ბენდმა გაამხილა, რომ ახალ მასალაზე მუშაობს. ჯგუფმა ინსტაგრამზე Abbey Road Studios-იდან ფოტო გამოაქვეყნა, წარწერით: „ამ უქმეებზე ჩვენს კარგ მეგობართან, ნაილთან ერთად ვმუშაობთ Abbey Road Studios-ში. დარჩით ჩვენთან.”
ნაილ როჯერსმა, რომელმაც ბენდთან რამდენიმე უმნიშვნელოვანესი ჰიტის შექმნისას უკვე ითანამშრომლა, ეს მომენტი საკუთარ სოციალურ ქსელებშიც გააზიარა. „გუშინ, მუშაობის დროს, ისევე მხიარულად გავატარეთ დრო, როგორც ყოველთვის!“ – აღნიშნა როჯერსმა.
ეს შემოქმედებითი გადაკვეთა თითქმის ათწლიანი პაუზის შემდეგ შედგა – უკანასკნელად ისინი ერთად 2015 წლის ალბომზე, Paper Gods-ზე მუშაობდნენ. სწორედ ამ ალბომშია შესული სინგლი Pressure Off, რომელშიც ჟანელ მონე მონაწილეობს და რომელიც ჩარტების მოწინავე ათეულში მოხვდა როგორც აშშ-ში, ისე ბრიტანეთში.
როჯერსისა და Duran Duran-ის თანამშრომლობა 40 წელზე მეტს ითვლის: 1984 წელს როჯერსმა რემიქსი გააკეთა ბენდის ცნობილი ნამუშევრისათვის – The Reflex. ამას მოჰყვა ფანების ფავორიტი The Wild Boys ხოლო მოგვიანებით – მეოთხე სტუდიური ალბომი Notorious, რომელიც 1986 წელს გამოიცა. როჯერსის მუსიკისთვის დამახასიათებელი გრუვი Duran Duran-ის ჟღერადობის განუყოფელი ნაწილი გახდა. 2004 წელს როჯერსი კვლავ შეუერთდა ბენდს ალბომ Astronaut-ზე მუშაობისას. ეს იყო პერიოდი, როდესაც ჯგუფის ორიგინალური ხუთეულიც ხელახლა შეიკრიბა.
Duran Duran ევროპულ და ბრიტანულ ტურნეს იწყებს, რომლის ფარგლებშიც ნაილ როჯერსი და მისი ბენდი CHIC სპეციალური სტუმრის სტატუსით წარდგებიან. ტურნე 3 ივნისს ფინეთში დაიწყება და მოიცავს დიდ ქალაქებს, მათ შორის ამსტერდამს, რომს, დუბლინსა და ბრიტანეთის სხვადასხვა ცნობილ საკონცერტო ვენიუს. ბოლო კონცერტი ივლისის დასაწყისში გაიმართება.
ჯერჯერობით უცნობია, Abbey Road-ის სესიები ახალ ალბომზე მუშაობის ფარგლებში მიმდინარეობს, თუ ცალკეული რელიზის, მაგრამ ეს მათი პირველი სტუდიური ნამუშევარი იქნება 2023 წლის ჰელოუინის თემატიკის ალბომის – Danse Macabre-ის შემდეგ.
Duran Duran-ს მსოფლიოს მასშტაბით 100 მილიონზე მეტი ალბომი აქვს გაყიდული და გრემის ორი ჯილდოს მფლობელია. ბენდმა ბოლო წარმატებას ჩარტებში 2021 წელს მიაღწია – Future Past იყო ალბომი, რომელიც Billboard 200-ის ჩარტში 28-ე ადგილს იკავებდა.
რაც შეეხება ნაილ როჯერსს, ის კვლავ მუსიკალური ინდუსტრიის ერთ-ერთი ყველაზე ავტორიტეტული პროდიუსერია, რომლის რეზიუმეშიც ისეთი არტისტები ფიგურირებენ, როგორებიც არიან: დევიდ ბოუი, მადონა, Daft Punk და მრავალი სხვა მუსიკოსი.
