მადონა სოციალურ ქსელში გამოჩნდა და ფანებს მომავალი ალბომი Veronica Electronica წარუდგინა.
„Ray of Light საეტაპო მომენტი იყო ჩემი, როგორც არტისტის ცხოვრებაში,” – დაწერა პოპის დედოფალმა თავის 1998 წლის ალბომზე, რომელსაც ხშირად მიაწერენ ელექტრონული მუსიკის მეინსტრიმ მუსიკაში ინტეგრირებას. სწორედ მის რემიქსს წარმოადგენს Veronica Electronica.
„იმ დროს დიდ მეტამორფოზს გავდიოდი. ახალი გაჩენილი მყავდა ქალიშვილი ლოლა, ნაპოვნი მქონდა სულიერი გზა და მზად ვიყავი, კანი გამომეცვალა და ნაკლებად გაკვალულ გზას დავდგომოდი.”
მადონამ ახსნა, რომ სწორედ Ray of Light-ის პროდიუსერის, უილიამ ორბიტის დახმარებით შეაბიჯა ელექტრონულ მუსიკაში და მიიღო შთაგონება, შეექმნა ალტერ ეგო იმ სახელით, რომელიც მას კათოლიკურ ეკლესიაში მიანიჭეს. „ასე დაიბადა Veronica Electronica. გაიცანით ჩემი მეორე ნახევარი.”
მომდევნო პოსტში მომღერალმა თავისი შავ-თეთრი ფოტო გამოაქვეყნა ხელოვნური ინტელექტის მიერ გენერირებული ვიდეოთი, რომელიც Veronica Electronica-ს გამოცემას აანონსებს.
ალბომის გამოშვების თარიღად მადონამ 25 ივლისი დაასახელა. ალბომში სულ რვა იშვიათი და გამოუცემელი რემიქსი შევა. მომღერალმა უკვე გამოსცა Veronica Electronica-ს ერთი სინგლი – Skin (The Collaboration Remix Edit).
