2025 წელს ქართველი არტისტი Creams ევროპულ ტურნეს იწყებს. ამის შესახებ მან ინსტაგრამზე დაწერა. ჯერჯერობით უცნობია ტურნეს დაწყების ზუსტი თარიღი, ასევე ქალაქები და ვენიუები, სადაც მუსიკოსი კონცერტებს გამართავს.
Creams (ნათია ჭიჭინაძე) ამჟამად ნიუ-იორკში ცხოვრობს. 2025 წელს გამოვა მისი სადებიუტო ალბომიც, რომელიც ჯერ კიდევ 2023 წელს დაანონსდა. ნიუ-იორკში გადასვლის შემდეგ Creams აქტიურად ცდილობს, ადგილობრივ მუსიკალურ სცენას დაუკავშირდეს. ამ დრომდე, მან უკვე რამდენიმეჯერ გამართა ლაივ-პერფორმანსი და პერიოდულად DJ სეტებსაც უკრავს. ახლახან არტისტს ლაივი ჰქონდა ნიუ-იორკში ქართველების მიერ დაარსებულ კლუბ Basement-ში. აღსანიშნავია, რომ სწორედ ამ კლუბშია გადაღებული 2024 წლის პოპულარული ფილმის, Babygirl-ის ერთ-ერთი ცნობილი სცენა ნიკოლ კიდმანისა და ჰარის დიკინსონის მონაწილეობით.
რაც შეეხება Creams-ს, ახალგაზრდა არტისტსა და პროდიუსერს, ქართველი მსმენელი მას 2019 წლიდან უკვე კარგად იცნობს. 2020 წლიდან Creams კომპანია Sony Music Group-ის მუსიკალურ ლეიბლთან, AWAL Records-თან თანამშრომლობს. არტისტს გამოშვებული აქვს არაერთი სინგლი, რომელიც ქართულ მუსიკალურ სივრცეში დიდი პოპულარობით სარგებლობს. მათ შორის არის: Die For You, Sleep On Me, Run. აღსანიშნავია, რომ ტრეკი Sleep On Me სტრიმინგ სერვის Netflix-ის ცნობილ სერიალში, Lucifer-ში გაჟღერდა.
