ლეგენდარული გრანჟ ტრიოს 1991 წლის ჰიტ სიმღერის, Smells Like Teen Spirit-ის გამორჩეულმა ვიდეოკლიპმა YouTube-ზე ორ მილიარდ ნახვას გადააჭარბა.
სამუელ ბაიერის მიერ გადაღებული კლიპი, რომელშიც ბენდის ვოკალისტი კურტ კობეინი და მისი ჯგუფის წევრები მონაწილეობენ, MTV-ზე 1991 წელს გამოჩნდა და მალევე ბენდმა გლობალური წარმატება მოიპოვა.
აღსანიშნავია, რომ YouTube-ზე ორ მილიარდზე მეტი ნახვის მქონე მუსიკალური ვიდეოების ძირითადი უმეტესობა პოპის, ლათინო, ქანთრისა და ჰიპ-ჰოპის ჟანრის შემსრულებლებს ეკუთვნით, რომელთა შორის არიან: ჯასტინ ბიბერი, ტეილორ სვიფტი, Maroon 5, ქეთი პერი, ენრიკე იგლესიასი, ლუის ფონსი და დედი იანკი, ადელი, ედ შირანი, შაკირა და ალან უოქერი, თუმცა უნდა ითქვას, რომ ამ ისტორიულ ნიშნულზე რამდენიმე როკსიმღერის ვიდეოც ავიდა.
ორი მილიარდი ნახვა აქვთ როკ არტისტებს: Twenty One Pilots (Stressed Out, Heathens), Imagine Dragons (Believer, Thunder), Guns N’ Roses (November Rain) და Linkin Park („Numb).
სიმღერა Smells Like Teen Spirit YouTube-ზე პირველად 2009 წელს აიტვირთა და 2019 წელს 1 მილიარდ ნახვას მიაღწია.
სიმღერის გამოსვლიდან ორი თვის შემდეგ, 1991 წლის 23 ნოემბერს, Smells Like Teen Spirit Billboard-ის ალტერნატიული სიმღერების სათავეში მოექცა და Billboard Hot 100-ზე მე-6 ადგილი დაიკავა.
პოპ-რადიოსთვის უჩვეულო ხუთწუთიანი ჰიტი იმ პერიოდში ყველაზე მოულოდნელი სიმღერა და ვიდეოკლიპი აღმოჩნდა, როცა ჰიტ-პარადებს ბრაიან ადამსი, მაიკლ ბოლტონი, მერაია ქერი და Boyz II Men მართავდნენ.
სიმღერამ ჯგუფის მეორე სტუდიურ ალბომ Nevermind-ს ჩაუყარა საფუძველი, რომელიც 1992 წლის 11 იანვარს Billboard 200-ის სათავეში მოექცა და პირველ ადგილზე მყოფი მაიკლ ჯექსონის ტოპ ალბომი Dangerous ჩაანაცვლა.
ნახეთ Nirvana-ს ვიდეოკლიპი Smells Like Teen Spirit:
