განსაკუთრებული კონცეფციის მქონე TELA Festival 2024 წელს დაარსდა, რომელიც ბუნებას, ტექნოლოგიას, ხელოვნებასა და მუსიკას აერთიანებს. ყოველწლიურად ფესტივალის პროგრამა ღონისძიებათა სერიას ეძღვნება, რომელიც ხუთ ძირითად ელემენტს – მიწას, ცეცხლს, წყალს, ჰაერსა და სამყაროს მოიცავს. ეს ყველაფერი კი საერთო ჯამში ინტეგრირებულ გამოცდილებას ქმნის, სადაც ბუნება, ხელოვნება და ხმოვანი გარემო ჰარმონიულად ერთიანდება.
დაარსების წელს ფესტივალის მთავარ თემად შერჩეული იყო მიწა, წელს კი ცეცხლის ძლიერი ენერგია იქნება. ცეცხლის ვიზუალური იდენტობა და კონცეფცია შემოქმედებითად შეისწავლის მის სიმბოლურ, ემოციურ და კულტურულ მნიშვნელობებს, გარდამქმნელ ძალას და მუდმივი მოძრაობის ესთეტიკას, რომელიც ფესტივალის წლევანდელ ატმოსფეროში იქნება გამოვლენილი.
ფესტივალი საქართველოში ელექტრონული მუსიკის გამორჩეულ არტისტებთან და ადგილობრივ შემსრულებლებთან ერთად სტუმრებს რამდენიმე სცენისგან შემდგარ მუსიკალურ პროგრამას სთავაზობს: ფესტივალზე იქნება ტექნო მუსიკისთვის განკუთვნილი სცენა – BAHN STAGE; ჰაუსის, ტექნოჰაუსისა და ელექტრო მუსიკის ჟღერადობით გაჯერებული სივრცე – FOREST STAGE და 303HZ STAGE – ჰაუსისა და დიპ ჰაუსის სცენა. აღსანიშნავია, რომ ფესტივალის უკვე დადასტურებული ჰედლაინერია ლეგენდარული ელექტრონული მუსიკის პიონერი Ben Klock!
„ჩვენი ქვეყნისთვის და თითოეული ჩვენგანისთვის ასეთ დაძაბულ დროს ძალიან რთული აღმოჩნდა ფესტივალის ჩატარების გადაწყვეტილების მიღება, თუმცა თქვენი მხარდაჭერისა და თანადგომის დიდი იმედი გვაქვს და გვჯერა, რომ ერთად შევქმნით კიდევ ერთ საინტერესო და დასამახსოვრებელ გამოცდილებას… წელს არაერთ საინტერესო და მსოფლიო ელექტრონული მუსიკის და ლოკალური სცენის გამორჩეულ არტისტს ვუმასპინძლებთ და გვჯერა, რომ წინ შთამბეჭდავი თავგადასავალი გველოდება.“ – აღნიშნულია ფესტივალის განცხადებაში.
ფესტივალის ერთ-ერთი მნიშვნელოვანი მოვლენაა TELA X KHIDI Showcase და TELA X 303HZ.
წელს TELA Festival 2025-ის სივრცე კიდევ უფრო მასშტაბურია და 3000-დან 4000-მდე სტუმარს უმასპინძლებს. გარდა ამისა, ფესტივალის ტერიტორიაზე განთავსდება კარვების ქალაქიც.
TELA Festival 2025-ის ბილეთების შესაძენად და დეტალური ინფორმაციის გასაცნობად ეწვიეთ ბმულს.
