ცნობილი ამერიკული როკ-ჯგუფის, The Beach Boys-ის დამფუძნებელი, ბრაიან უილსონი 82 წლის ასაკში გარდაიცვალა, ცნობა ამის შესახებ 11 ივნისს გავრცელდა. პოლ მაკარტნიმ მას პატივი მიაგო და მისი სიმღერები განსაკუთრებულად მოიხსენია. – „მე ის მიყვარდა“ – აღნიშნა ლეგენდარულმა მუსიკოსმა.
The Beach Boys-ის ვოკალისტის, ბრაიან უილსონის გარდაცვალების მიზეზი და ზუსტი თარიღი ამ დროისთვის ოფიციალურად არ არის ცნობილი. უილსონის ინსტაგრამ ანგარიშზე გამოქვეყნებულ განცხადებაში კი წერია: „ახლა სიტყვებიც არ გვყოფნის. გთხოვთ, პატივი სცეთ ჩვენს პირად სივრცეს, რადგან ჩვენი ოჯახი გლოვობს. ვაცნობიერებთ, რომ ამ ტკივილს მთელი მსოფლიო იზიარებს.“
ბრაიან უილსონს არაერთმა დიდმა მუსიკოსმა მიაგო პატივი, მათ შორის არიან ბობ დილანი, სერ ელტონ ჯონი, Questlove და სხვები.
პოლ მაკარტნიმ 12 ივნისს ინსტაგრამზე წერილი გამოაქვეყნა, სადაც The Beach Boys-ის ლეგენდარულ წარმომადგენელს იხსენებს:
„ბრაიანი იმ იდუმალ მუსიკალურ გენიას ატარებდა, რაც მის სიმღერებს საოცრად განსაკუთრებულს ხდიდა. ნოტები, რომლებიც მას ესმოდა და ჩვენამდე მოჰქონდა, იყო ერთდროულად მარტივი და იმავდროულად ბრძნული. მე ის მიყვარდა და ჩემთვის დიდი პატივი იყო, რომ ცოტა ხნით მის კაშკაშა სინათლესთან ახლოს ყოფნა შემეძლო.”
მაკარტნი ბრაიან უილსონს ემოციური სიტყვებით დაემშვიდობა: „როგორ გავაგრძელოთ მის გარეშე – მხოლოდ ღმერთმა უწყის (“God Only Knows”). მადლობა ყველაფრისთვის, ბრაიან…”
უილსონის მიერ შექმნილმა ალბომმა Pet Sounds (1966) მაკარტნისა და მთლიანად The Beatles-ის შემდგომ სტუდიურ ნამუშევრებზე უდიდესი გავლენა იქონია. განსაკუთრებით კი ლეგენდარულ ალბომზე – Sgt. Pepper’s Lonely Hearts Club Band (1967). მაკარტნიმ სიმღერა God Only Knows ყველა დროის ერთ-ერთ საუკეთესო სიმღერად დაასახელა და 2000 წელს უილსონი სიმღერების ავტორთა დიდების დარბაზში შეიყვანა.
როკ-ენ-როლის დიდების დარბაზში წარმოთქმულ სიტყვაში მაკარტნიმ ღიად გამოხატა თავისი დამოკიდებულება ბრაიან უილსონის მიმართ.
„განსაკუთრებით 60-იანებში მან შექმნა მუსიკა, რომელიც როცა პირველად მოვისმინე, ცრემლებად დავიღვარე. აქ არც სიტყვებია საჭირო, არც მელოდია, უბრალოდ რაღაც ძალიან ღრმაა მასში. იშვიათად ხდება, როცა მუსიკა ასე მოქმედებს ჩემზე. ვფიქრობ, ეს ნამდვილად გამოხატავს მის გენიალურობას. ამ კაცს ჭეშმარიტად ეკუთვნის დიდების დარბაზი. მადლობა იმისთვის, რომ მისი მოსმენისას ცრემლები თავისით მოდის. მადლობა, რომ გვაქვს ეს მაგია.”
Pet Sounds-ის გამოსვლის შემდეგ უილსონის მენტალური ჯანმრთელობის მდგომარეობა გაუარესდა და საბოლოოდ შიზოაფექტური აშლილობა დაუდგინდა. 2024 წლის თებერვალში ცნობილი გახდა, რომ მას დემენცია განუვითარდა.
ნახეთ ბრაიან უილსონის შესახებ დადებული პოსტი ინსტაგრამ გვერდზე:
