სოსო ლაღიძის სახელობის ხელოვნების საერთაშორისო ფესტივალ „თბილისი რიტმი“ 2025-ის ფარგლებში სპექტაკლი, სახელწოდებით „ნატალია ოსიპოვა – ბუნების ძალა“ გაიმართა.
საპრემიერო სპექტაკლი კლასიკური და თანამედროვე დადგმების ერთგვარი გაერთიანებაა, სადაც ნატალია ოსიპოვა მსოფლიოს სხვადასხვა საბალეტო დასის წამყვან მოცეკვავეებთან ერთად წარდგა. ეს იყო ბალეტის ფერწერული მოძრაობების, შუქის, მუსიკისა და სხეულით გადმოცემული ემოციების ჰარმონიული შერწყმა, სადაც ნატალია ოსიპოვასთან ერთად სცენაზე ქორეოგრაფი და მოცეკვავე ჯეისონ კიტელბერგერი, ვენის ოპერის წამყვანი სოლისტი ვიქტორ კაიშეტა, ლონდონის ნაციონალური ბალეტიდან ფრანჩესკა ველიკუ და დენიელ მაკორმიკი, მარიინსკის თეატრის წამყვანი სოლისტი, პინა ბაუშის დასის მოწვეული არტისტი დარია პავლენკო და შაჰარ ბინიამინის დასის მთავარი მოცეკვავე ჯოზეფ კუდრა წარდგნენ.
„ეს ჩემი პირველი ვიზიტია თბილისში. ჩემი დიდი ხნის ოცნება იყო, რომ ჩამოვსულიყავი ამ ულამაზეს ქვეყანაში, იმიტომ რომ ეს არის ქვეყანა, საიდანაც არიან წარმოშობით კლასიკური ბალეტის გამორჩეული შემსრულებლები, როგორიც არის, მაგალითად, ვახტანგ ჭაბუკიანი, ნინო ანანიაშვილი, ირმა ნიორაძე… მართლაც არაჩვეულებრივი მოცეკვავეები. ცოტათი ვნერვიულობდი, რადგან განსხვავებული პროგრამით წარვდექით, რომელიც კლასიკური ბალეტის და თანამედროვე ცეკვის სინთეზია, ეს ყოველთვის ერთგვარი რისკია, რადგან არ იცი, ამას მაყურებელი როგორ შეხვდება, მაგრამ ძალიან ვისიამოვნე. მთელი გული და ენერგია ჩავდე წარმოდგენაში და მინდა, უდიდესი მადლობა გადაგიხადოთ, რადგან ჩემთვის დიდი პატივი იყო დღევანდელი გამოსვლა.“ – ნატალია ოსიპოვა.
თითოეულმა მათგანმა სცენაზე ინდივიდუალიზმით სავსე და ამავდროულად ერთიანი, ჰარმონიული წარმოდგენა შექმნეს, რომელიც თბილისში შეკრებილ მაყურებელს დიდხანს დაამახსოვრდება.
ფესტივალი „თბილისი რიტმი“ წელს მრავალფეროვანი და შთამბეჭდავი პროგრამით გამოირჩევა და სეზონის დახურვასაც განსაკუთრებულად გეგმავს: 9 სექტემბერს გრიბოედოვის თეატრში ლეგენდარული ფრანგი აკორდეონისტი რიშარ გალიანო თავისი ახალი ალბომის პრემიერით წარდგება, რაც ფესტივალს დახვეწილი მუსიკალური პასაჟით დაასრულებს.
სოსო ლაღიძის სახელობის ხელოვნების საერთაშორისო ფესტივალი „თბილისი რიტმი“ საქართველოს კულტურის სამინისტროსა და თბილისის მერიის მხარდაჭერით ხორციელდება და უკვე დამსახურებულად იკავებს ღირსეულ ადგილს ქვეყნის კულტურულ რუკაზე.
