იტალიაში ტექნომუსიკის ახალი ფესტივალი – Adriatic Sound Festival დაფუძნდა. ფესტივალის პირველი გამოშვება 13-14 ივნისს ქალაქ ფანოს აეროპორტში გაიმართა. ორი დღე, ორი მონუმენტური სცენა, 28 არტისტი და მუსიკა დღის 2 საათიდან ღამის 2 საათამდე – ფესტივალმა გრანდიოზული სტარტი აიღო. ორგანიზატორების თქმით, მაყურებელთა რაოდენობამ ჯამში 17 000 შეადგინა. პირველი სეზონისთვის კი ასეთი მასშტაბის წარმატებას არავინ ელოდა. ფესტივალის ჰედლაინერები ტექნომუსიკის ისეთი ვარსკვლავები იყვნენ, როგორებიც არიან Rüfüs Du Sol, ტექნოს მაესტროდ წოდებული Sven Väth და ა.შ.
გახსნის ღონისძიება 12 ივნისის საღამოს წმინდა ფრენსისის ყოფილ ეკლესიაში შედგა. ადგილმდებარეობა გასაოცარი იყო – მე-14 საუკუნის ნაგებობა სახურავის გარეშე, რომელმაც ისეთივე ატმოსფერო შექმნა, როგორებიცაა სან გალიანოს მონასტერი ტოსკანაში ან ლისაბონის კარმელიტის მონასტერი. ეს კარგი შესაძლებლობაა, რომ ფანოს არქიტექტორულ მემკვიდრეობას ახალი მნიშვნელობა შესძინო. ეს უკანასკნელი კი ფესტივალის მთავარი კონცეფციის ნაწილია, რომელიც ქალაქის რომაულ წარსულს ეხმაურება.
ფესტივალზე ორი სცენა იყო: მთავარი სცენა The Temple და The Hangar, რომელიც ფანოს აეროპორტის ანგარში იყო მოწყობილი, რაც ფესტივალის ერთ-ერთი მომგებიანი გადაწყვეტა იყო.
ფესტივალის განმავლობაში ისმოდა იტალიის ბევრი სხვადასხვა კუთხის აქცენტი, ასევე ხშირად გაიგონებდით ინგლისურ საუბარსაც. აუდიტორიის დიდი პოტენციალით – რაც ზაფხულობით ადრიატიკის სანაპიროზე ტურისტების რაოდენობით იწყება – Adriatic Sound Festival-ს ყველაფერი აქვს იმისთვის, რომ ევროპული მნიშვნელობის ღონისძიებად იქცეს.
სტატიის თავდაპირველი ვერსია გამოქვეყნდა Billboard იტალიაში.
