ბარბრა სტრეიზანდმა ინსტაგრამზე ვიდეო შემდეგი აღწერით გააზიარა: „როდესაც მერაია ქერისა და არიანა გრანდესთან ერთობლივი სიმღერის იდეა პირველად გაჩნდა, მაშინვე ვიგრძენი, რომ ეს აუცილებლად ქალთა გაძლიერების საკითხებზე უნდა ყოფილიყო.“
კომპოზიცია სტრეიზანდის ახლად გამოცემულ ალბომში, The Secret of Life: Partners, Volume Two-შია შესული, რომელიც Columbia Records-ის მეშვეობით გამოიცა.
„სიტყვები: ჩვენ გვაქვს სრული უფლება, არჩევანი გავაკეთოთ – ჩემთან ძალიან ახლოსაა. ეს სიმღერა იქცა საშუალებად, რომ სამი ძლიერი ნებისყოფის მქონე ქალი ერთად შეკრებილიყო. მადლობა მერაია ქერისა და არიანა გრანდეს ამ ნიჭისა და განსაკუთრებული მომენტის გაზიარებისთვის.” – აღნიშნავს პოსტში ბარბრა სტეიზანდი.
მერაია ქერისთვის, რომელიც ხშირად ასახელებდა ბარბრა სტრეიზანდს, როგორც მისი შთაგონების წყაროს, ეს გამოცდილება ემოციური აღმოჩნდა. „ბავშვობიდან მიყვარდა ბარბრა, ამიტომ, როცა შესაძლებლობა მომეცა, მასთან ერთად მემუშავა სიმღერაზე One Heart, One Voice, ეს ჩემთვის დიდი პატივი იყო.“
არიანა გრანდესთვის კი ორივე არტისტი ბავშვობიდან სათაყვანებელი იყო: “ბარბრა, პირდაპირი გაგებით, მუდამ ჩემი ცხოვრების ნაწილი იყო. მახსოვს მის კონცერტზე პირველად დედასთან ერთად ვიყავი, როგორღაც, კონცერტის DVD ჩანაწერშიც აღმოვჩნდი.”
სამივე არტისტი სიმღერას მორიგეობით ასრულებს, რაც ერთმანეთში სინთეზირდება. One Heart, One Voice ერთიანობისა და გამძლეობის ბალადაა, რომელიც პოპის ისტორიის მოყვარულთათვის ნამდვილად ისტორიული მოვლენაა, სადაც ექვსი ათწლეულის სამი ლეგენდარული მომღერალი ერთიანდება.
The Secret of Life: Partners, Volume Two ბარბრა სტრეიზანდის 2014 წლის ალბომის, Partners-ის ერთგვარი გაგრძელებაა, რომელიც გამოსვლისთანავე Billboard 200-ის პირველ ადგილზე მოხვდა. ალბომი აერთიანებს დუეტებს ისეთ მომღერლებთან, როგორებიც არიან: სიტივი უანდერი, ჯონ ლეჯენდი და ბლეიკ შელტონი. ახალი ალბომი სწორედ ამ მიმართულებას აგრძელებს და მოიცავს დუეტებს პოლ მაკარტნისთან, ჯოშ გრობანთან, ჰოზიერთან და სხვა შემსრულებლებთან.
აღსანიშნავია, რომ ბარბრა სტრეიზანდი შოუბიზნესის ისტორიაში ერთ-ერთი ყველაზე მეტი ჯილდოს მფლობელი არტისტია. იგი Billboard 200-ში 11-ჯერ მოხვდა პირველ ადგილზე, რაც ქალ შემსრულებელთა შორის რეკორდული მაჩვენებელია. მას ასევე მიღებული აქვს ათი გრემი, ორი ოსკარი, ხუთი ემი და სხვა უამრავი ჯილდო. რაც შეეხება მერაია ქერის, იგი Billboard Hot 100-ის ისტორიაში სოლო არტისტებში ყველაზე მეტი N1 სინგლის მფლობელია (19), თავისთავად, არიანა გრანდეც არ ჩამორჩება ამ მიღწევებს: მისი ექვსი ჰიტი ჩარტების სათავეში N1 ადგილს იკავებს, თავად არიანა კი მსოფლიოში ერთ-ერთ ყველაზე მეტად მოსმენად არტისტად ითვლება.
სიმღერა One Heart, One Voice სამივე არტისტის ერთობლივი თანამშრომლობის პირველი შემთხვევაა.
