ბილი ჯო არმსტრონგი ნამდვილად არ ელოდა მოვლენების ამგვარ განვითარებას, როცა კონცერტის მსვლელობისას სცენაზე ერთ-ერთი ფანი მიიწვია.
Green Day-ს კონცერტების ტრადიციისამებრ, არმსტროგნმა თავისი აკუსტიკური გიტარა დარბაზში მყოფ ერთ-ერთ მაყურებელს გადასცა და შანსი მისცა, ბენდთან ერთად შეესრულებინა მათი სიმღერა Good Riddance. თუმცა სოციალურ ქსელში გავრცელებულ ვიდეოებში ჩანს, რომ სცენაზე ასული ფანი არასწორ აკორდს იღებს, არმსტრონგი კი დაბნეული ჩანს.
„შენ მითხარი, რომ მისი დაკვრა შეგეძლო!” – ეუბნება მუსიკოსი და ცდილობს, სწორი ნოტის აღებაში დაეხმაროს. მოულოდნელად კი ფანი „ოაზისის” ყველაზე დიდი ჰიტის, Wonderwall-ის დაკვრას იწყებს. ამის გააზრებისას, არმსტრონგმა მას სწრაფად გამოართვა გიტარა და ახალგაზრდა მამაკაცი სცენიდან გაიყვანეს.
„ჯანდაბა,” – ამბობს არმსტრონგი. „კარგი მცდელობა იყო.”
კონცერტი Green Day-ს The Saviors Tour-ის ფარგლებში გაიმართა, რომელიც 2024 წლის მაისში დაიწყო. ამავე ტურნეში მოხდა კიდევ ერთი ცნობილი ინციდენტი, როცა კონცერტის მსვლელობისას არმსტრონგმა მიკროფონი და გიტარა ძირს დადო და თითის გაშვერით უსაყვედურა კონკრეტულ ფანს, რომელმაც, როგორც ჩანს, მუსიკოსი წყლის თოფით გაწუწა.
2025 წელს ბენდი რამდენიმე ფესტივალზეც წარდგა, მათ შორის იყო Coachella, BottleRock და Download Festival. ამ უკანასკნელის დროს არმსტრონგმა სცენიდან აშშ-ის მთავრობა გააკრიტიკა. „დონალდ ტრამპი და მისი ადმინისტრაცია ფაშისტი მთავრობაა. ახლა კი ჩვენზეა დამოკიდებული მათთან საპასუხო ბრძოლა.”
მაისში არმსტრონგსა და მისი ბენდის წევრებს ჰოლივუდის დიდების ხეივანში ვარსკვლავი გაუხსნეს.
