Doja Cat ბრუნდება. გრემის მფლობელი არტისტი V Magazine-ის ივლისის ნომრის გარეკანზე გამოჩნდა. მიუხედავად იმისა, რომ 2023 წელს იმავე გამოცემისთვის მიცემულ ინტერვიუში გააკრიტიკა გაყიდვადი, კომერციული მუსიკა, ის აღნიშნავს, რომ ახალი ალბომი პოპზე ორიენტირებული პროექტია.
„მინდა საკმარისად მქონდეს გააზრებული და ვაღიარო, რომ ეს პოპზე ორიენტირებული პროექტია. ვიცი, რომ შემიძლია პოპის კეთება და პოპი ნიშნავს იმას, რაც პოპულარულია. ბევრისთვის ეს ერთგვარ სპორტად იქცა – მათთვის, ვინც უბრალოდ მაყურებელია. მათ სიამოვნებთ [პოპი], მაგრამ შესაძლოა, არც კი სცემენ პატივს იმას, რაც ის სინამდვილეშია,“ – ამბობს Doja Cat.
მიუხედავად პოპმიმართულებისა, გამოცემა აღნიშნავს, რომ ალბომში Doja Cat-ისგან ბევრ რეპსაც უნდა ველოდოთ. 29 წლის არტისტი ალბომში სიყვარულზე, რომანტიკასა და ურთიერთობებზე საუბრობს – მათ შორის იმაზეც, თუ როგორ წარმოუდგენია საკუთარი ურთიერთობები მომავალში.
„კონცეფცია მიმართულია სიყვარულისკენ, სექსისა და ურთიერთობებისკენ. ზოგადად ურთიერთობებს ეხება – მათ შორის საკუთარ თავთანაც. დღეს მუსიკაში ბევრი მღერის განშორებაზე და იმაზე, თუ როგორ დავიღალეთ კაცებით. მეც მაქვს ასეთი სიმღერა ალბომში. მაგრამ საქმე ისაა, რომ ამის გადმოსაცემად უამრავი გზა არსებობს.“
ალბომში გამოხატულ სიყვარულის კონცეფციაზე საუბრისას Doja Cat ამბობს: „ადრე ადამიანებს ერთმანეთთან ყოფნა უნდოდათ და ახლა თითქოს ეს ყველაფერი ზედაპირული გახდა. თითქოს ყალბია, სიყვარულისგან და რომანტიკისგან დაცლილია.”
თუნდაც მისი ახალი ალბომის პირველი კვირის გაყიდვები შედარებით დაბალი აღმოჩნდეს, Doja Cat ამბობს, რომ სურს, ისიამოვნოს იმით, რასაც ქმნის. „რაც არ მინდა, არის ის პატარა ურჩხული ჩემში, რომელიც მხოლოდ წარმატებაზე ფიქრობს. მინდა, უფრო იმაზე ვიფიქრო: როგორი ჟღერადობა აქვს მიქსს? მართლა მჭირდება ეს ინსტრუმენტი აქ? უნდა ჩავწერო ხელახლა ეს ფრაზა? მუსიკას ღირებულს ჟღერადობა ხდის. არტისტი ვერ ვიქნებოდი, ამას რომ არ ვაფასებდე, ხომ ასეა? თუ ოდესმე ჩემი პროექტი წინაზე ნაკლებ წარმატებული იქნება, არ მინდა, პანიკაში ჩავვარდე. მინდა, ეს ფაქტი მივიღო.”
მიუხედავად იმისა, რომ ფანებს დაანონსებული ალბომიდან – Vie ჯერ არცერთი კომპოზიცია არ მოუსმენიათ, Doja Cat ბოლო თვეებში აქტიური იყო: მან მონაწილეობა მიიღო ფილმ F1-ის საუნდტრეკში დონ ტოლივერთან ერთად სიმღერით Lose My Mind, ასევე ითანამშრომლა Lizzo-სთან ტრეკში Still Can’t Fuh.
Doja Cat-ის ბოლო ალბომი Scarlet 2023 წელს გამოვიდა და Billboard 200-ის ჩარტში მე-4 ადგილი დაიკავა. Vie კი, სავარაუდოდ, 2025 წლის შემოდგომაზე გამოვა.
