ხონძისა და პაპუნა შარიქაძის ერთობლივი სადებიუტო ალბომი First of Many 2024 წლის აპრილში სტუდია Blue Frog-ში ჩაიწერა და ის მუსიკოსების საავტორო კომპოზიციებს აერთიანებს. ალბომში შესულია ნაწარმოებები, რომლებიც ცოცხლად არაერთხელ შესრულებულა და ასევე ის ნამუშევრებიც, რომელთაც დუეტი პირველად წარუდგენს მსმენელს.
„ეს პროექტი ერთგვარად აგვირგვინებს ჩემი და ხონძის მრავალწლიან მეგობრობასა და მუსიკალურ თანამშრომლობას. ალბომს კიდევ უფრო განსაკუთრებულს ხდის ფორტეპიანოსა და ალტ საქსოფონის გაუფილტრავი და შიშველი დუეტი, სადაც ჩემი და ხონძის შინაგანი სამყაროებისგან ერთი მუსიკალური სინგულარობა იქმნება. ეს არის ბევრი ფერისა და ხასიათის მუსიკალური ესთეტიკის შერწყმა. ზოგან კლასიკური ჟანრის ელემენტებს ამოიკითხავთ, ზოგან ჯაზის, ქართული ფოლკლორისა და სპირიტუალური მუსიკის. ძალიან მიხარია, რომ First of Many ერთწლიანი ამერიკული ინკუბაციის შემდეგ, 9 ივლისს დაიბადება და ყველა შეძლებს მის მოსმენას,” – პაპუნა შარიქაძე.
ხონძის თქმით, ეს მხოლოდ დასაწყისია და მუსიკოსები კიდევ მრავალ საინტერესო პროექტს შემოგვთავაზებენ: „ამ ალბომის გამოსვლით ჩვენი დუეტი ახალ ეტაპზე გადადის, რაც კიდევ ბევრი მუსიკის გაზიარებას გულისხმობს.”
First of Many მსმენელებს შესაძლებლობას მისცემს, გაიცნონ და კიდევ უფრო ღრმად გაითავისონ თანამედროვე ქართული ინსტრუმენტული მუსიკის ინდივიდუალური მიდგომა, სადაც კლასიკური ჟღერადობა, ჯაზი და ფოლკლორული მოტივები ერთიან მუსიკალურ ენად იქცევა.
