ჯონ ლეჯენდმა ღიად ისაუბრა კანიე უესტთან ურთიერთობაზე. მომღერალმა ინტერვიუ მისცა Hot 97-ის გადაცემას Ebro in the Morning, სადაც ის ჩრდილოამერიკულ ტურნეზე სასაუბროდ იყო მიწვეული. ეს ტურნე მის სადებიუტო ალბომს, Get Lifted-ს ეძღვნება, რომელიც 20 წლის იუბილეს აღნიშნავს და 40 ქალაქს მოიცავს.
ინტერვიუს დროს მუსიკოსს იმ კომენტარებზეც ჰკითხეს, რომლებიც მასზე Ye-მ ცოტა ხნის წინ, DJ Akademiks-თან საუბრისას გააკეთა. გაზაფხულზე, კანიე უესტმა DJ Akademiks-სთან ინტერვიუში თქვა, რომ ჯონ ლეჯენდს, ამინდის მიუხედავად, ყოველთვის სვიტერი აცვია და კარტოფილის პიურეს სუნი აქვს.
„ის შეპყრობილი იყო ჩემი სვიტერებით და ამბობდა, რომ პიურეს სუნი მაქვს,” – თქვა ლეჯენდმა კანიეს შესახებ.
„რაც არ უნდა იყოს, ყველა ეს კომენტარი სევდას მგვრის. პირადად ჩემზე ეს არ მოქმედებს, მაგრამ მთლიანად ისტორიაა სევდიანი. რომ უყურებ ადამიანს, რომელიც ადოლფ ჰიტლერს აქებს… ხედავ მას, როგორც სიძულვილის, ზიზღისა და ღვარძლიანი ენერგიის წყაროს… ეს არის ადამიანი, რომელიც საუკუნის ერთ-ერთი გამორჩეული არტისტი, შემსრულებელი და დიზაინერი იყო. ყველაფერს აკეთებდა იმისთვის, რომ სამყარო უფრო ლამაზი და საინტერესო ყოფილიყო და ახლა ასეთად რომ იქცა, ეს უბრალოდ სევდიანია,” – თქვა ლეჯენდმა.
შემდეგ ჯონ ლეჯენდს უესტთან თანამშრომლობის ადრეულ წლებზეც ჰკითხეს. მან მხოლოდ დადებითად გაიხსენა პერიოდი, როცა ერთად მუშაობდნენ. „ის სავსე იყო ენერგიით, კრეატიულობითა და ოპტიმიზმით. ნამდვილად გვჯეროდა, რომ მუსიკაში ახალ სიტყვას ვამბობდით. იმ ყველაფრის ნაწილი რომ ვიყავი, ძალიან შთამაგონებელი იყო. ამიტომაც არის დღეს ეს ყველაფერი ასეთი სევდიანი. ერთად მართლა შესანიშნავი რაღაცები გავაკეთეთ – როგორც კოლექტივმა, როგორც მოძრაობამ. წარმოგიდგენიათ, რამდენი შესანიშნავი მუსიკა შეიქმნა იმ წლებში? G.O.O.D. Fridays და საერთოდ ყველაფერი, რაც მისი კარიერის პირველ ათწლეულში ხდებოდა. ეს ნამდვილად ამაღელვებელი იყო და ძალიან მიხარია, რომ ამის ნაწილი ვიყავი. არავითარი სინანული არ მაქვს. მიუხედავად იმისა, რომ დღეს სრულიად სხვაგან არის, მიხარია, რაც მაშინ გავაკეთეთ,“ – აღნიშნა ჯონ ლეჯენდმა.
