ლიზა ბათიაშვილი გერმანიის ერთ-ერთი ყველაზე პრესტიჟული ჯილდოს, იმპერატორ ოტოს პრემიის ლაურეატი გახდა. პრემია გადაეცემათ ადამიანებს, რომლებიც ემსახურებიან ევროპული ერთიანობის პროცესსა და ევროპის იდეის ხელშეწყობას. ჯილდო 2005 წლიდან არსებობს და ორ წელიწადში ერთხელ გაიცემა. სხვადასხვა დროს მისი ლაურეატები გახდნენ ევროპის ქვეყნების პრეზიდენტები და მნიშვნელოვანი პოლიტიკური ფიგურები (ანგელა მერკელი – გერმანიის ყოფილი კანცლერი, ვაირა ვიკე-ფრეიბერგა – ლატვიის ყოფილი პრეზიდენტი, რიხარდ ფონ ვაიცზეკერი – გერმანიის ყოფილი პრეზიდენტი, ორგანიზაცია „ეუთო” და ა.შ).
წელს, პრემიის 10 წლის იუბილეზე, პირველი შემთხვევაა, როცა პრესტიჟული ჯილდო ხელოვანებს გადაეცათ. ლიზა ბათიაშვილთან ერთად ჯილდოს მფლობელი გახდა პიანისტი იგორ ლევიტიც.
იმპერატორ ოტოს კულტურული ფონდის განცხადებით, მუსიკოსები დაჯილდოვდნენ მათი შეუპოვარი ძალისხმევისთვის ევროპაში დიალოგის, მშვიდობისა და ჰუმანიტარული ღირებულებების ხელშეწყობაში.
ლიზა ბათიაშვილსა და იგორ ლევიტს პრემია 2 ივლისს მაგდებურგის საკათედრო ტაძარში გადაეცათ. ხელოვანებმა სამადლობელი სიტყვებიც წარმოთქვეს.
„სწორედ ამიტომ, მუსიკა და ხელოვნება არ შეიძლება იყოს აპოლიტიკური, განსაკუთრებით – დღეს! ჩვენ ყოველთვის შეგვიძლია საზოგადოების თანადგომა. ხელოვანები იმავდროულად მოქალაქეები ვართ და ყოველთვის უნდა ვიბრძოლოთ, გვქონდეს პასუხისმგებლობა და აქტიურად მივიღოთ მონაწილეობა საზოგადოების ფორმირებაში,” – განაცხადა ლიზა ბათიაშვილმა.
იმპერატორი ოტო თანამედროვე ევროპის ერთ-ერთ დამფუძნებელ მამად მიიჩნევა. სწორედ მისი მმართველობის დროს მიიღო ევროპამ ახალი სახე და საფუძველი ჩაეყარა დღევანდელი ევროპის იდეას. იმპერატორ ოტოს კულტურული ფონდი პატივს მიაგებს ისტორიული მმართველის მემკვიდრეობას და მისი სახელობის პრემიით უკვდავყოფს მას.
ნახეთ ვიდეო.
