მუსიკოს Sandro Bibich-ის პირველი ქართულენოვანი კომპოზიცია, „რომ არ ვიცი, რა დავწერო”, გალაკტიონ ტაბიძის ლექსზე შეიქმნა. იგი არა მხოლოდ პოეტის შინაგან სამყაროს, არამედ შემოქმედებითი პროცესის ემოციურ მხარესაც წარმოაჩენს.
Sandro Bibich – მუსიკოსი:
„2022 წელს გალაკტიონ ტაბიძისადმი მიძღვნილ კონცერტში მივიღე მონაწილეობა, სადაც მის ერთ-ერთ ლექსზე უნდა შემექნა სიმღერა. წავიკითხე პოეტის ბიოგრაფია, შემდეგ მასზე გადაღებულ დოკუმენტურ ფილმს ვუყურე და შემოქმედებასაც გავეცანი. ეს პროცესი საკმაოდ ხანგრძლივი აღმოჩნდა. საღამოს, გადაღლილი გონებით, უკვე ვეღარ ვახერხებდი ლექსისა და მუსიკის თანხვედრაში მოყვანას. სწორედ ამ დროს აღმოვაჩინე ლექსი, სახელწოდებით „რომ არ ვიცი, რა დავწერო”. ჯერ გამიხარდა, რომ ჩემს იმდროინდელ მდგომარეობას კარგად აღწერდა და დავიწყე ჩემი მუსიკალური იდეების არქივის ქექვა. მივადექი მელოდიას, რომელიც 2010 წელს დავწერე. ამ თემის რითმული მონახაზი და ლექსის ხმოვნები იმდენად ზუსტ თანხვედრაში იყო, რომ ესეც რაღაცნაირი ნიშანი და აღმაფრთოვანებელი მომენტი აღმოჩნდა.” – ამბობს ავტორი.
Sandro Bibich-ის თქმით, მუსიკა და ტექსტი ამ პროცესთან ბუნებრივად შეთავსდა და საბოლოოდ, შეიქმნა სიმღერა, რომელიც თვითშემეცნებაზე, ემოციურ გადაღლილობასა და ქვეცნობიერზეა.
„სიმღერა ცნობიერებაზეა, რომელმაც არ იცის, რა დაწეროს და რა იმღეროს, რადგან აქვს გადაღლილი გული და ემოციური ინტელექტი. მისი ეგო არარეალიზებულობისგან არის ტანჯვაში, მაგრამ მასში მყოფი ბავშვი ეთამაშება და ამ სიმღერით თავის თავს ახსენებს, რომ ის ქაოსის მიღმა მყოფი ცნობიერებაა.“ – აღნიშნავს Sandro Bibich.
სიმღერა 5 ივლისს მუსიკალურ პლატფორმებზე გამოქვეყნდა, რაც მსმენელს შესაძლებლობას აძლევს, თავად შეიგრძნოს ტექსტისა და მუსიკის ის ორგანული სინთეზი, რომელმაც მისი შექმნა განაპირობა:
