Black Sabbath-ის გამოსამშვიდობებელ კონცერტზე სიდ ვილსონმა კელი ოსბორნს ოჯახის თანდასწრებით სთხოვა ხელი. მათი ემოციური რეაქცია კამერამაც აღბეჭდა.
„კელი, ამ სამყაროში ყველაზე მეტად მიყვარხარ.” – დაიწყო სიდმა, თუმცა ოზი ოსბორნმა ხუმრობით შეაწყვეტინა: „ძალიან მაგარი ამბავია, თუმცა ჩემი გოგო ცოლად შენ არ მოგყვება.”
ინსტაგრამზე გამოქვეყნებულ ვიდეოში სიდი კვლავ აგრძელებს წინადადებას: „არაფერი ისე არ გამახარებს, როგორც მთელი დარჩენილი ცხოვრების შენთან გატარება. ასე რომ, ვკითხულობ შენი ოჯახისა და ჩვენი მეგობრების წინაშე, კელი, გამომყვები ცოლად?”
კადრებში ჩანს, რომ სიდ ვილსონმა დაიჩოქა და თანხმობის შემდეგ კელის თითზე ბეჭედი გაუკეთა. დარბაზი კი ამ ფაქტს ოვაციებით შეხვდა.
კელის და სიდს უკვე ჰყავთ შვილი – 3 წლის სიდნი, რომელიც 2022 წელს დაიბადა. ახალშობილის შესახებ გადაცემაში The Talk პირველად ბებიამ, შერონ ოსბორნმა 2023 წლის იანვარში ისაუბრა, თუმცა მოგვიანებით კელი ოსბორნმა აღნიშნა, რომ ჯერ მზად არ იყო, შვილი მთელი მსოფლიოსთვის წარედგინა.
წყვილი ერთმანეთს 1999 წელს, Slipknot-ის და Ozzfest-ის ტურნეს დროს შეხვდა. სოციალურ ქსელში 2022 წლის იანვარში კელიმ ურთიერთობის შესახებ გაამხილა და დაწერა: „ოცდასამწლიანი მეგობრობის შემდეგ ვერ ვიჯერებ, სად მოვედით.”- კელიმ სიდს საუკეთესო მეგობარი და სულის მეგზური უწოდა და ასევე აღნიშნა, რომ იგი საოცრად შეყვარებულია.
ოზი ოსბორნისა და Black Sabbath-ის გამოსამშვიდობებელი კონცერტი – Back to the Beginning, 5 ივლისს ბირმინგემში, სტადიონ Villa Park-ში გაიმართა, სადაც 45 000-მდე გულშემატკივარი შეიკრიბა. კონცერტზე ბენდის ძველი შემადგენლობა იყო წარმოდგენილი: ოზი ოსბორნი, ტონი აიომი, გიზერ ბატლერი და ბილ უორდი.
გამოსამშვიდობებელ კონცერტზე აუდიტორიის წინაშე ასევე წარდგნენ ლეგენდარული ბენდები: Metallica, Slayer, Guns N’ Roses, Tool, Pantera, Anthrax.
