დოლი პარტონმა გაამხილა, რომ ქმრის გარდაცვალების შემდეგ სიმღერების წერისგან დროებით თავის შეკავება გადაწყვიტა. მისივე თქმით, ამ ეტაპზე ჯერ კიდევ არ არის მზად იმ ღრმა ემოციების გასაზიარებლად, რასაც სიმღერის ტექსტის წერა მოითხოვს.
ქანთრის ლეგენდამ ამის შესახებ ისაუბრა ქლოი კარდაშიანის პოდკასტში – Khloé in Wonder Land.
„ჩემი ქმარი სამი თვის წინ გარდაიცვალა. რამდენჯერმე ვცადე რაღაცის დაწყება, მაგრამ არ გამომდის. იმდენი არაჩვეულებრივი და შთამაგონებელი იდეა მომდის, მაგრამ მგონია, ვერ დავასრულებ. ამ ეტაპზე არ შემიძლია, რადგან ძალიან ბევრი სხვა რაღაც მაქვს გასაკეთებელი და ახლა ასეთ ემოციებში გადაშვება უბრალოდ ფუფუნებაა, რომლის უფლებასაც თავს ვერ მივცემ,” – თქვა პარტონმა.
დოლი პარტონის ქმარი, კარლ დინი, 2025 წლის მარტში, 82 წლის ასაკში გარდაიცვალა. წყვილმა ერთად 60 წელზე მეტხანს იცხოვრა.
„კარლთან ერთად მრავალი მშვენიერი წელი გავატარე,“ – დაწერა პარტონმა სოციალურ ქსელში. „ვერც ერთი სიტყვა ვერ აღწერს იმ სიყვარულს, რაც ამ 60 წელზე მეტი ხნის განმავლობაში გვაკავშირებდა. მადლობა თქვენი ლოცვისა და თანაგრძნობისთვის.“
მიუხედავად დროებითი პაუზისა, დოლი პარტონი აქტიურად აგრძელებს სხვადასხვა პროექტზე მუშაობას, მათ შორისაა მისი მიუზიკლი – Dolly: An Original Musical და არაერთი საქველმოქმედო ინიციატივა. რაც შეეხება სიმღერების წერის პროცესს, არტისტმა მას თავისი ცხოვრების დიდი სიხარული უწოდა. როგორც თავად ამბობს, როცა დრო დადგება, წერას კვლავ დაუბრუნდება.
„ყველაფერი იწყება ამბით ან სიმღერით… მგონია, რომ სწორედ ამის გამო მიყვარს წერა – რადგან ამ დროს განსაკუთრებით ახლოს ვარ ღმერთთან,“ – განაცხადა მან.
