ბენი ბლანკოს თქმით, მისი და სელენა გომესის ქორწილი მშვიდი და ნაკლებად ხმაურიანი იქნება

ბენი ბლანკომ ჯეიკ შეინის პოპულარულ პოდკასტში – Therapuss – გულახდილი ინტერვიუ ჩაწერა, სადაც ის პირად ცხოვრებაზე, კარიერასა და მენტალურ ჯანმრთელობაზე საუბრობს.

ეპიზოდში, რომელიც YouTube-ზე, Spotify-ზე და Apple Podcasts-ზე გამოქვეყნდა, ბლანკო შეეხო სელენა გომესთან ურთიერთობას, ობსესიურ-კომპულსიური აშლილობის (OCD) წინააღმდეგ ბრძოლასა და ბილი აილიშთან ერთობლივ პირველ სამუშაო გამოცდილებას.

ბლანკო, რომელმაც გომესს ხელი 2024 წლის ბოლოს სთხოვა, აღიარებს, რომ ქორწილის დაგეგმვა ჯერ არ დაუწყიათ. „სინამდვილეში, ცოტა დასვენება მინდა. ბოლო პერიოდში სულ ვმუშაობდი,“ – თქვა მან.

„უბრალოდ მინდა, საწოლში ვიწვე, დავივიწყო კვირის რომელი დღეა და რაღაცებს ვუყურო. ჩვეულებრივ, ასე არ ვიქცევი, მაგრამ სელენასთან ერთად მთელი დღის ასე გატარება მიხარია,” – ამბობს ბენი ბლანკო.

მისი თქმით, ისინი ზაფხულში აპირებენ დასხდნენ და დიდი დღისთვის მზადება დაიწყონ. „ეს ქორწილი ხალხს გააგიჟებს,“ – იხუმრა შეინმა, რაზეც ბლანკომ უპასუხა: „არა, ის მშვიდი იქნება.“

მრავალი ჯილდოს მფლობელმა და არაერთი ჰიტის შემქმნელმა ბლანკომ ასევე გაიხსენა ბავშვობაში განცდილი შფოთვა და რიტუალები, რომლითაც შემაწუხებელი ფიქრების თავიდან აცილებას ცდილობდა: „ბავშვობაში ბგერების სახით რაღაც ხმას გამოვცემდი. მეგონა, რომ ამას თუ არ გავაკეთებდი, ჩემი მშობლები დაიხოცებოდნენ,“ – ამბობს ის. „ახლაც მაქვს რაღაც პატარა ჩვევები, სახის გარკვეულ ნაწილებს ვეხები ან მოჩვენებით ხველას ვიწყებ – ეს უნებლიედ ხდება.“

ბლანკოს თქმით, მიუხედავად სირთულეებისა, შეძლო იმ ჩვევების დაძლევა, რომლებიც სხვებისთვის იყო დამღლელი: „ყველა იმ ჩვევას შევეშვი, რაც სხვისთვისაა გამაღიზიანებელი. თუმცა მაინც ვაკეთებ პატარა რაღაცებს – მაგალითად, აბაზანაში ყველაფერს ისე ვათავსებ, რომ ეტიკეტის მხარეს იდგეს,“ – ამბობს ის ღიმილით.

ფანების დიდი გამოხმაურება გამოიწვია ინტერვიუს იმ ნაწილმა, როცა ბლანკომ Disney-ს სერიალი Wizards of Waverly Place ბილი აილიშის ჰიტის – Bad Guy-ს შთაგონებად დაასახელა.

„სერიალის საუნდტრეკი ვიცი, რადგანაც ის Bad Guy-ს შთაგონება იყო,“ – ამბობს ბლანკო. „ბილისთან მაშინ ვმუშაობდი, როცა ის 14 წლის იყო.“ როგორც განმარტავს, ის და ბილის ძმა ფინიასი ერთმანეთს საერთო იურისტმა გააცნო იმ დროს, როცა აილიშს ჯერ სცენაზე არც კი ჰქონდა ფეხი დადგმული.