საერთაშორისო ორგანიზაცია Global Citizen-ის ორგანიზებით და Coldplay-ს ლიდერის, კრის მარტინის კურატორობით, FIFA-მ ისტორიაში პირველად წარადგინა FIFA Club World Cup-ის ფინალის მუსიკალური შოუ, როცა მოედანზე „ჩელსი“ და „პარი სენ-ჟერმენი“ უპირისპირდებოდნენ ერთმანეთს.
MetLife-ის სტადიონზე, ტაიმებს შორის წარდგა ოთხი მსოფლიო ვარსკვლავი – Doja Cat, Tems, J Balvin და Coldplay. შოუ ფუტურისტული დიზაინის, ე.წ. მრავალდონიან სცენაზე მიმდინარეობდა, რომელიც სტადიონის ზემოთ, თითქოს ჰაერში იყო ჩამოკიდებული. შოუ J Balvin-მა გახსნა თავისი ენერგიული ჰიტით – Mi Gente. კოლუმბიელი არტისტი სცენაზე გამოვიდა მოცეკვავეებისა და დრამერების თანხლებით, რომელთა კოსტიუმებიც კოლუმბიის ეროვნული ფერებით იყო გაფორმებული.
შემდეგ სცენაზე Tems გამოჩნდა – ნიგერიელმა შემსრულებელმა Love Me Jeje იმღერა. ამის შემდეგ სცენაზე მეორედ დაბრუნდა Balvin ტრეკით Reggaeton და შოუ Doja Cat-ის გამოსვლით გაგრძელდა, რომელმაც თავისი ჰიტი Woman შეასრულა. მის სასცენო იმიჯში ჩანდა დაანონსებული ალბომის ელემენტებიც – არტისტს წელზე დიდი ასოებით ეწერა „Vie”.
„წარმოვადგენდე ამერიკას ამ უნიკალურ სცენაზე, ჩემთვის დიდი პატივია. ეს არის სცენა, რომელიც მსოფლიოს ყველა კუთხიდან გააერთიანებს ადამიანებს,“ – თქვა Doja Cat-მა Rolling Stone-ისთვის მიცემულ ინტერვიუში გასულ კვირას. „განსაკუთრებით მადლობელი ვარ, რომ FIFA-სა და Global Citizen-ის განათლების ფონდის ფარგლებში, გლობალური განათლების მხარდაჭერა შემიძლია.“
შოუს სიურპრიზი კი Coldplay-ის გამოსვლა იყო. ბენდმა A Sky Full of Stars შეასრულა. მუსიკალური ნომრის დროს სცენის ფონზე ცისარტყელას ფერები ანათებდა. ჯგუფს შეუერთდა ავსტრალიელი არტისტი ემანუელ კელი, რომელმაც საზოგადოებას ერთიანობისაკენ მოუწოდა.
„მიხარია, რომ ერთად ვართ,“ – მიმართა მსმენელს კელიმ. ემანუელ კელი FIFA-ს ისტორიაში გახდა პირველი შშმ არტისტი, რომელიც ტაიმებს შორის გამართულ მუსიკალურ შოუზე გამოვიდა.
როგორც Global Citizen-ის დირექტორმა ჰიუ ევანსმა აღნიშნა, ეს შოუ FIFA-ს ისტორიაში განსაკუთრებული მოვლენაა, რადგან სცენაზე გაერთიანდნენ არტისტები მსოფლიოს სხვადასხვა წერტილიდან. „ეს საერთაშორისო შემადგენლობა იდეალურად წარმოაჩენს, როგორ შეუძლია მუსიკასა და ფეხბურთს მსოფლიოს გაერთიანება და როდესაც ერთად ვმოქმედებთ, შეგვიძლია უზარმაზარ შედეგს მივაღწიოთ – განსაკუთრებით ბავშვებისთვის განათლების ხელმისაწვდომობის კუთხით.“
FIFA-მ და Global Citizen-მა უკვე 10 მილიონი დოლარის მობილიზება შეძლეს. ორგანიზაციების მიზანია 100 მილიონი დოლარის მობილიზება, რომელიც ბავშვების განათლების დაფინანსებას მოხმარდება FIFA Global Citizen Education Fund-ის მეშვეობით. ეს პარტნიორობა გაგრძელდება 2026 წელს, როცა FIFA-ს მსოფლიო ჩემპიონატის ფინალის მუსიკალური შოუ კვლავ MetLife-ის სტადიონზე გაიმართება.
იხილეთ მუსიკალური შოუს სრული ჩანაწერი:
