King Crimson-ის მენეჯერის თქმით, გულშემატკივრები ახალი ალბომის გამოცემის შესახებ ჭორებს არ უნდა აყვნენ

პროგრესული როკის ლეგენდარული ბენდის,  King Crimson-ის ახალი ალბომის შესახებ ჭორები გავრცელდა, თუმცა ბენდის მენეჯერმა გულშემატკივრებს მოლოდინი გაუქარწყლა და მოუწოდა, რომ ჭორებს არ აჰყოლოდნენ.

ალბომის გამოცემის შესახებ ინფორმაცია პირველად გასულ კვირას გავრცელდა, როდესაც გიტარისტმა ჯაკო ჯუაქსიკმა  ჟურნალ Goldmine-თან ინტერვიუში სოლო პროექტზე ისაუბრა და 2013 წელს ბენდ King Crimson-ში გაწევრიანება გაიხსენა:

,,ეს ჩემთვის  საოცარი გამოცდილება იყო, რომელიც ახლაც გრძელდება. ამ ეტაპზე  King Crimson-ის სტუდიურ ალბომზე ვმუშაობთ. როდის, როგორ და რა ფორმატით გამოვა  ეს ალბომი  – ჩემს კომპეტენციას სცდება, მაგრამ, დიახ, ეტაპობრივად ვმუშაობთ ამ მიმართულებით. რამდენიმე თვის წინ მენეჯერმა გვკითხა,  შეგვეძლო თუ არა, ასე რომ, ვინ იცის, რა ფორმით და როდის გამოვა. ვნახოთ.”

ლეგენდარული ბენდის ახალი ალბომის შესახებ ინფორმაცია გულშემაკტივრებისთვის საკმაოდ მოულოდნელი აღმოჩნდა, რადგან King Crimson-ის 2021 წლის ტურნეს შემდეგ ითვლებოდა, რომ მათ მუსიკალური კარიერა დაასრულეს.  

გავრცელებული ჭორების შემდეგ კი ბენდის მენეჯერმა დევიდ სინგლტონმა სოციალურ მედიაში განცხადება გაავრცელა:

“შესაძლოა, ბენდი მუშაობს რაღაც ახალზე, რაც ჯერ არავის მოუსმენია. ამ მუსიკის მთავარი ნაწილი სამი დრამერია. მათ უკვე ჩაწერეს თავიანთი პარტიები სუდიაში, ცალცალკე სუფთა ჟღერადობა რომ ყოფილიყო. ასე რომ, რაღაც ახალის დასაწყისი არსებობს, თუმცა ჯერ ნამდვილად არ ვიცით, ეს ალბომი გამოვა თუ არა, ან საერთოდ იქნება თუ არა. შემოქმედებით პროცესში შედეგი ყოველთვის გაურკვეველია.

დიახ, ჩაწერები დაწყებულია. ახალ სტუდიას ვაშენებთ და როცა მზად იქნება, ვნახავთ, რა გამოვა. თუმცა ამ ეტაპზე ახალი ალბომით აღფრთოვანება ნაადრევია.” – განაცხადა დეივდ სინგლტონმა.

King Crimson 1968 წელს რობერტ ფრიპის, იან მაკდონალდის, გრეგ ლეიკის, მაიკლ ჯაილსის და პიტერ სინფილის მიერ დაარსდა, მომდევნო წელს კი ბენდმა სადებიუტო ალბომი In the Court of the Crimson King გამოსცა.

ჯგუფი პირველად 1974 წელს,  შვიდი ალბომის გამოცემის შემდეგ დაიშალა, თუმცა შემდგომ წლებში არაერთი კონცერტი გამართეს ერთად, მათი ბოლო სტუდიური ალბომი – The Power to Believe – 2003 წელს გამოვიდა.

ბენდი ბოლოს 2021 წლის დეკემბერში დაიშალა. პირვანდელი შემადგენლობიდან ჯგუფის ერთადერთი წევრი რობერტ ფრიპი რჩებოდა. მან ჟურნალ Rolling Stone-თან თქვა, რომ King Crimson-ის ტურნეს მხოლოდ იმ შემთხვევაში გამართავდა, „თუ ზუსტად ეცოდინებოდა, რომ ეს ერთადერთი გზა იქნებოდა მესამე მსოფლიო ომის თავიდან ასაცილებლად.”