Astronomer-ის აღმასრულებელი დირექტორი ენდი ბაირონი თანამდებობიდან გადადგა მას შემდეგ, რაც Coldplay-ს კონცერტზე ის კამერამ თანამშრომელთან ჩახუტებული დააფიქსირა.
ბოსტონში გამართული კონცერტის დროს დიდ ეკრანზე მოულოდნელად გამოჩნდა ბაირონი, რომელიც თავისი კომპანიის მთავარ HR-ს, კრისტინ კაბოს ეხვეოდა. მას შემდეგ, რაც წყვილმა გააანალიზა, რომ ეკრანზე ჩანდნენ, ბაირონი სწრაფად გავიდა კადრიდან, კაბო კი სახეზე ხელებაფარებული შეტრიალდა. დამოუკიდებლად ორივე მათგანი ქორწინებაში იმყოფება.
„ან რომანი აქვთ, ან უბრალოდ ძალიან მორცხვები არიან,” – თქვა კრის მარტინმა სცენიდან ინციდენტის დროს.
მომდევნო დღეებში ვიდეომ სოციალური მედია დაიპყრო. ინციდენტის შესახებ გაჩნდა მიმებისა და ხუმრობების ტალღა. ქანთრის მომღერალი მორგან უოლენი ამ ამბავს კონცერტზეც კი გამოეხმაურა და მაყურებელს მიმართა, რომ მის კონცერტზე ამ მხრივ დაცულები იყვნენ.
შემთხვევას გამოეხმაურა Astronomer-იც. კომპანიამ განცხადება გამოაქვეყნა, სადაც ეწერა, რომ ბაირონი დაკავებულ თანამდებობას ტოვებდა და კომპანია მის შემცვლელს ეძებდა.
„ასტრონომერი ერთგულია იმ ღირებულებებისა და კულტურის, რითაც ჩვენი დაარსების დღიდან ვხელმძღვანელობთ. ჩვენი ლიდერები ყოფაქცევისა და ანგარიშვალდებულების სტანდარტებს უნდა აწესებდნენ. ცოტა ხნის წინ კი ეს სტანდარტები დაირღვა. ენდი ბაირონმა გადადგომა მოითხოვა და დირექტორთა საბჭომ მისი მოთხოვნა დააკმაყოფილა. ამჟამად ბორდი ახალ აღმასრულებელ დირექტორს ეძებს. მანამდე კი მის მოვალეობას კომპანიის თანადამფუძნებელი პიტ დეჯოი შეასრულებს,” – ვკითხულობთ განცხადებაში.
„ამ კვირამდე ჩვენი კომპანია ცნობილი იყო, როგრც პიონერი DataOps სივრცეში. მიუხედავად იმისა, რომ ჩვენი ცნობადობა ერთ ღამეში სრულიად შეიცვალა, არ შეცვლილა ჩვენი პროდუქტი და მომხმარებლისთვის გაწეული სამუშაო. ჩვენ განვაგრძობთ იმის კეთებას, რაც საუკეთესოდ გამოგვდის – ვეხმარებით მომხმარებლებს ყველაზე რთული მონაცემებისა და ხელოვნური ინტელექტის საკითხებში.”
ინციდენტის შესახებ განცხადება არ გაუვრცელებია Coldplay-ს. თუმცა ბენდის შაბათის კონცერტზე ერთ-ერთ ფანს ეჭირა ბანერი წარწერით: „ის არ არის ჩემი დირექტორი,” – და ისარი მის გვერდით მდგომ კაცზე იყო მითითებული.
კრის მარტინმა კი მაყურებელს მიმართა: „გვინდა, რომ ზოგიერთ თქვენგანს მოგესალმოთ. როგორ ვაკეთებთ ამას – გამოვიყენებთ ჩვენს კამერებს და ზოგიერთი თქვენგანი დიდ ეკრანზე გამოჩნდებით. ასე რომ, გთხოვთ, თუ ჯერ არ გაქვთ მაკიაჟი, გაიკეთეთ ახლავე.”
აღნიშნული შოუს შემდეგ ერთ-ერთმა ფანმა დაწერა, რომ შაბათის კონცერტზე დიდ ეკრანზე არც ერთი წყვილი აღარ უჩვენებიათ.
