19 ივლისს Charli XCX ბენდ The 1975-ის წევრ ჯორჯ დენიელთან ერთად საქორწილო კაბაში გამოწყობილი დააფიქსირეს. – ამის შესახებ გამოცემა TMZ წერს. სოციალურ ქსელ X-ზე გავრცელებულ ვიდეოში კი ჩანს, თუ როგორ აღნიშნავს წყვილი ოჯახის წევრებისა და მეგობრების გარემოცვაში ამ მნიშვნელოვან დღეს. ბრიტანელმა მომღერალმა საქორწინო ცერემონიალისთვის მოკლე, თეთრი, მხრებზე ჩამოშლილი აბრეშუმის კაბა შეარჩია, ჯორჯ დენიელს კი მუქი ფერის პიჯაკი და ღია ფერის პერანგი ეცვა.
TMZ-ის ინფორმაციით, ცერემონია ვიწრო წრეში ჩატარდა, სადაც მხოლოდ 20-მდე ადამიანი იმყოფებოდა. ღონისძიებას ფრონტმენ მეთ ჰილის გარდა ბენდ 1975-ის წევრებიც ესწრებოდნენ.
Charli XCX და ჯორჯ დენიელი ერთმანეთს 2022 წლიდან ხვდებოდნენ. მათი ნიშნობის შესახებ კი 2023-ში გახდა ცნობილი. წყვილის ურთიერთობას ოფიციალური სახე 2022 წლის მაისში მიეცა, მას შემდეგ, რაც Charli XCX-ის ალბომზე Crash ერთად იმუშავეს. იმავე წელს ალბომმა Billboard 200-ის ჩარტში მე-7 ადგილი დაიკავა. დენიელმა პოპვარსკვლავის სხვა ტრეკების პროდიუსინგშიც მიიღო მონაწილეობა, მათ შორის არის სემ სმითთან დუეტი სიმღერით – In the City და Hot Girl, რომელიც ფილმის Bodies Bodies Bodies ერთ-ერთი საუნდტრეკია.
Charli XCX-მა ფურორი მოახდინა გასულ წელს რიგით მეექვსე ალბომ Brat-ის გამოცემით, რომელმაც Billboard 200-ის ჩარტში მესამე ადგილი დაიკავა, ეს კი არტისტის კარიერაში ყველაზე მაღალი მაჩვენებელია.
ალბომ Brat-ის მხარდასაჭერი წარმატებული ტურნეს შემდეგ ყურადღება ეკრანზე გადაიტანა და ამჟამად ის A24-ისთვის საკუთარ ფილმზე, The Moment-ზე მუშაობს. ცოტა ხნის წინ კი Charli XCX-მა მსახიობის და პროდიუსერის ამპლუაში ცნობილი იაპონელი ჰორორ-რეჟისორის, ტაკაში მიიკეს ახალ ფილმშიც (Yakuza Apocalypse) მიიღო მონაწილეობა.
