რამდენიმე დღის შემდეგ, რაც სოციალურ ქსელში მომავალი პროექტი დააანონსა, Tyler, The Creator-მა განაცხადა, რომ ორშაბათს, 21 ივლისს, ახალ ალბომს გამოსცემს.
ბრუკლინში გამართულ კონცერტზე (18 ივლისს) 34 წლის რეპერმა და პროდიუსერმა აუდიტორიას თავისი მეცხრე ალბომის სახელწოდება გაუმხილა – Don’t Tap the Glass. სცენის გარეთ ფანებმა შენიშნეს არტინსტალაციაც – ათლეტური ფიგურა, რომელიც გამჭვირვალე ყუთშია გამოკეტილი. როგორც ჩანს, ინსტალაცია ალბომის ყდას ეხმაურებოდა.
კონცერტამდე რამდენიმე დღით ადრე ტაილერმა ალბომის გამოცემა ფანებს ინსტაგრამზე გამოქვეყნებული დაშიფრული ფოტოებით მიანიშნა, მათ შორის იყო ლუი ვიტონის ჩანთა, მანეკენის თავი და უნიფორმაში გამოწყობილი მესაყვირე.
შაბათ დილას კი (19 ივლისს) მან ახალი ალბომისადმი მიძღვნილი ვებგვერდის ლინკი დადო – donttaptheglass.com, სადაც ვინილთან ერთად განთავსებულია ალბომის სახელწოდების წარწერების მქონე მაისური და ქუდებიც.
ივნისის თვეში ტაილერმა და Doechii-მ ლუი ვიტონის შოუზე პარიზში სიმღერა Get Right წარადგინეს. ეს მათი მეორე თანამშრომლობაა Balloon-ის შემდეგ, რომელიც შევიდა რეპერის Billboard 200-ის ლიდერ ალბომში Chromakopia. ამ ეტაპზე უცნობია, შევა თუ არა Get Right ახალ ალბომში.
Chromakopia-მ Billboard 200-ის ლიდერ პოზიციაზე 3 კვირა გაატარა. 14-სიმღერიან ალბომში მონაწილეობენ Doechii, Lil Wayne, GloRilla, Sexyy Red და სხვები. ტაილერი ამჟამად ჩრდილოამერიკულ ტურშია, რის შემდეგაც ავსტრალიაში, იაპონიაში, სამხრეთ კორეაში, ტაილანდსა და ფილიპინებში გაემგზავრება.
