ლეგენდარული იტალიური ამფითეატრი, Arena di Verona, ოპერის ფესტივალს მასპინძლობს. 18 ივლისს ამფითეატრის სცენაზე ჟორჟ ბიზეს „კარმენი“ შესრულდა, მთავარ როლში ქართველი მეცო-სოპრანო, ანიტა რაჭველიშვილი წარდგა. მისმა გამოსვლამ ანშლაგით ჩაიარა. ქართველი მეცო-სოპრანოს მიერ სოციალურ ქსელში გმოქვეყნებულ ვიდეოში ჩანს, თუ როგირი ოვაციებით ხვდება მას აუდიტორია.
ანიტა რაჭველიშვილი დღევანდელი საოპერო სცენის ერთ-ერთი გამორჩეული ხმაა. სხვადასხვა დროს ის წარმატებით წარდგა მრავალ გავლენიან სახელოვნებო სივრცეში. მათ შორის: Metropolitan Opera, (ნიუ-იორკი), Teatro alla Scala (მილანი), Royal Opera House (ლონდონი) და სხვაგან.
რაც შეეხება Arena di Verona-ს, ის ერთ-ერთი ყველაზე კარგად შემონახული ძველი რომაული ამფითეატრია, რომელიც დღემდე უნიკალურ საშემსრულებლო სივრცეს წარმოადგენს. Verona Arena Opera Festival პირველად 1913 წელს ჩატარდა და ჯუზეპე ვერდის „აიდათი“ გაიხსნა. მას შემდეგ ყოველ ზაფხულს ამფითეატრი მასპინძლობს საერთაშორისო მასშტაბის სპექტაკლებს, ბალეტებსა და კონცერტებს, რომელშიც მონაწილეობენ მსოფლიოში აღიარებული ვოკალისტები, დირიჟორები და საოპერო დასები.
