ათი წელი გავიდა მას შემდეგ, რაც ნიკ ქეივის შვილი, არტური გარდაიცვალა. ქეივმა საკუთარ ტკივილზე და გლოვის პროცესში მიღებულ გამოცდილებაზე საჯაროდ ისაუბრა. მუსიკოსის ჩანაწერი გამოქვეყნდა მის ონლაინ-პლატფორმაზე The Red Hand Files-ზე, სადაც ის გულწრფელად პასუხობს მსმენელების წერილებს. ერთ-ერთმა გუშემატკივარმა ქეივს ჰკითხა, რა შეცვალა ამ ათმა წელმა მისი და მისი მეუღლის, სუზის ცხოვრებაში და გრძელდება თუ არა ეს განცდა დღემდე.
„ტკივილი რჩება, მაგრამ აღმოვაჩინე, რომ დროთა განმავლობაში ის იცვლება. გლოვა ასაკთან ერთად ყვავილობის პერიოდს გადის – ის ნაკლებად მიგვაჩნია პირად ტრაგედიად ან კოსმოსურ ღალატად და უფრო პოეტური ხდება. ვსწავლობთ, როგორ მივენდოთ მას. როცა სიკვდილის გარდაუვალი უსამართლობის წინაშე ვდგავართ, ვხვდებით, რომ ის, რაც თავდაპირველად აუტანელი გვეგონა, შეიძლება სინამდვილეში სულაც არ იყოს აუტანელი. მწუხარება მდიდრდება, ღრმავდება, ტექსტურას იძენს. ის უფრო საინტერესო, შემოქმედებითი და მშვენიერი ხდება,” – წერს ქეივი.
მუსიკისის თქმით, ერთმა დიდმა განცდამ გააცნობიერებინა, როგორია, იყო ადამიანი: „აღმოვაჩინე, რომ საერთო ადამიანური ამბის ნაწილი ვარ. თანდათან შევიგრძენი ჩვენი ყოფიერების უზარმაზარი ღირებულება, იმავე დროს გავაცნობიერე ის საშინელი საფრთხე, რომელიც ამ მდგომარეობას თან ახლავს – ყველა მოვკვდებით. შევიგრძენი, რომ მიუხედავად ჩვენი უნიკალურობისა, ტკივილი საერთო გამოცდილებაა. დროთა განმავლობაში სუზი და მე მივხვდით, რომ სამყარო არც გულგრილია და არც ბოროტი – ის ძვირფასი, მოსიყვარულე, ლამაზი და ყოველთვის კეთილია.“
არტური, ნიკ ქეივის 15 წლის ვაჟი, 2015 წლის 14 ივლისს ინგლისში, ბრაიტონის კლდიდან გადავარდნის შედეგად გარდაიცვალა.
ეს ტრაგედია ქეივის შემოქმედებაზეც აისახა. არტისტმა გლოვა მუსიკალურად გადმოსცა Nick Cave & the Bad Seeds-ის 2016 წლის ალბომში – Skeleton Tree. ენდრიუ დომინიკის დოკუმენტური ფილმი – One More Time with Feeling კი გვიჩვენებს, თუ როგორ გადაიტანა ეს პერიოდი მუსიკოსმა და მისმა ბენდმა.
„აღმოვაჩინე, რომ არტურის გარდაცვალების პირველი ტრავმა ერთგვარი შიფრი იყო, რომლის მეშვეობითაც ღმერთი მესაუბრებოდა. ეს ღმერთი რწმენასა და რელიგიურ სისტემებზე კი არა, სამყაროს დანახვის გარკვეულ გზაზე ლაპარაკობდა. ის ჩემთვის აღქმის ფორმად იქცა – სიფხიზლის მდგომარეობად. ღმერთი ვიპოვე ყველაფერში – დიდ ბოროტებასა და ყველაზე ღრმა უიმედობაშიც კი,” – წერს გამოქვეყნებულ პოსტში ნიკ ქეივი.
The Red Hand Files-ზე ქეივი გულშემატკივრების კითხვებს ხშირად პასუხობს და სხვადასხვა პირად თუ შემოქმედებით თემას ეხება.
